Aizawl: Inrinni tlai khan Mizoram hmun thenkhatah thlipui thawkin khawthlangin harsatna an tawh phah hlawm a; mihring inhliam leh nunna chân erawh an awm lo.
Kawrthah khuaah Inrinni tlai dar 4 leh dar 5 inkar vel khan ruah nasa taka surin thlipui a tleh a, he khaw chhunga hmun tam takah thing tluin kawlphetha pekna hrui a delh chhiat bakah kawngpui thenkhat kaltlang theih lohva a siam a awm nual.
Hetiang thil thleng avang hian Kawrthah Hmarveng Branch YMA chuan OB meeting thu chhuakin hnatlang a ko va, mi 50 chuang thawk chhuakin kawngpui hnawkte thenfai a ni.
Kawlphetha pekna hrui siam ngaite an siam tha a, êng an dawng leh thei tawh.
Zirtawpni tlai dar 6 bawr vel khan Mauchar khua thlipui thawkin in pali vel a tichhia a, in chung hawk leh thing tluin a delh chhiatte an ni a, mihring thi leh hliam an awm lo nia thudawn a ni.
Inrinni khan VC leh YMA ten in chhia siam thain an hnatlang a, Sakawrdai Civil SDO-in silpouline a pe bawk.
Thlipui tleh hi Mauchar khaw chhehvel pawhin tuarin thil tihchhiat a nei lo thung.