Police officer chuan Reuters hnenah khualbuk luhchilhtute hian an luh hmain car bomb pahnih hmangin Zirtawpni thimhlim khan an bei hmasa a, a pawnah tipuakin a hungna leh a fate-pui ber an tichhia tih a sawi.
Khualbuk beihna a thlen hnu lawkah hian al-Shabab hnuaia awm website pakhatah helho hi tihluihnaa lutin tum bik pawh nei lovin an silai an hmet puak zui nia tar lan a ni a. An khualbuk luhchilh hi Somalian sorkar hnuaia thawkten thutkhawm pawimawh an neih fona hmun niin an tar lang bawk.
Venhim hna thawktuten khualbuk chung lam, a luhchilhtuten mi an hren behna lai an pawh mai thei lo va, helhi hian a lawn chhohna ber an bomb chhiat vang nia hriat a ni.
Mogadishu-a trauma hospital lian bera an director chuan an damdawi inah chuan hliam tuar mi 40 vel an enkawl thu a sawi a, khawpui chhung hmun dangah mortar tihpuah a ni bawk tih AFP a hrilh bawk.
al-Qaeda firfiak pawla nena inzawmna nei, al-Shabab hi kum tam tak chhung Somalian sorkar nena inbei tawh an ni a. An ram chhim leh laili hmun zau tak thununin sorkar inkulhna, Mogadishu lam hi an hawi thar leh mek.
Tun hnaiah an fighter-te hian Somalia-Ethiopia inrinna velah beihna tam tak an thlen a, an pawl kalphung thar an nei nia rinna a len phah hle.
Zirtawpnia khualbuk an luhchilh hi an ramin president atana May thlaa Hassan Sheikh Mohamud an thlan tlin hnua an chetna lian hmasa ber a ni.
Khualbuk leh thingpui dawr an bei fo va, Mogadishu-a an chetna lian ber erawh October, 2017-a khawpui lun lai taka p[uak thei khat tlat phur truck an tihpuaha mi 500 chuang an thihna kha a ni.
He thil thleng hi tute mahin an tihah an chhal lo va; mahse, an chet dan kalhmang leh tun hma lama an chet dan enin al-Shabab tih ngeia ngaih vek a ni.