Aizawl : Mizoram khawpui fai inelna leh Swachh survekshan 2023 denchhena Lawngtlaia khawpuia faina beihpui thlak tur chu Inrinni zing khan Lawngtlai Bazar Venga Areopagy-ah Lai Autonomous District Council (LADC)-a Sanitation changtu Exe. Member Lalropuia Chinzah-in a hawng a. Lawngtlaia hmun pawimawh leh lun laia hun tur bawlhhlawh bawm engemawzat a enkawltu tur association leh VC-te hnenah sem nghal niin, khawpui chhung tifaiin an hnatlang nghal bawk.
LADC-a Sanitation changtu EM Lalropuia Chinzah chuan Lawngtlai mipui ten faina kawnga mahni zawna hma an lakna chu a lawmawm viau rualin, hmasawnna tur tam tak a la awm avangin inthlahdah lova ṭan lak chhunzawm zel a ṭul thu a sawi a. LADC, Dist administration leh UD&PA deptt. te ṭangtlangin Lawngtlai khaw pui tana bawlhhlawh paihna leh thliarhranna tur a ruahman mek thu a sawi.
Fainain mimal leh khawtlang hmasawnna leh hriselna a keng tel tih sawiin, Lalropuia chuan khawpui fai inelna chu khua leh tui zawng zawng huap a nih hriaa midang leh khawpui dangte tana entawntlak khawpa inphochhuah tum turin mipuite a sawm a. Mizoram khawpui fai inelna atana inbuatsaihna atan sum hman tur Sub-committee kutah a hlan nghal bawk.