Russia President Vladimir Putin-a thawhpui hnai tak pakhat fanu chu car bomb hmang ni ngeia hriata thah a ni.
Kum 29 mi, Darya Dugina-i hi Moscow-a kawngpuia bomb tihpuahah a thi niin Russia-a investigative committee chuan a sawi.
A pa, Russian philosopher Alexander Dugin hi ‘Putin-a thluak bur’ tia sawi mai thin niin tum renga thah ni ngeia ngaih a ni.
Dugin-a hi Russia leh an hnam lenna tura na taka kal leh ngaihdan thawhtu, president nen pawha inkawmnel tak a ni.
A fanu nen hian Moscow bula kût hmannaah an kal dun a, a pa zawk hian he hunah zirtirna a pe nghe nghe.
‘Tradition’ festival an tih hi chhungkaw thiltih khawm ang deuh, art lama tuite intawh khawmna, Russian poet Alexander Pushkin-a pawh rei vak lo a lo chen tawhna, Zakharovo estate-a neih a ni.
An pafa hian Inrinni tlai khan car pakhatin an haw dun an tum a, an kal dawn tepah Dugin-a hian hmun khata chuan chu remchang ti lovin an chuan hrang a ni.
Telegram-a video tihdarhah chuan Dugin-a hian chhiatna thlenna hmuna emergency services thlen laia lirthei kang chhe nuai chu mak tih hmel taka a thlir lai a lang.
Chhuitute chuan Dugina-i hi Bolshiye Vyazemy bul lawka beihna a tawhna hmunah hian a thi niin an sawi.
A car-ah puak thei kamin a puak a, a kang zui a. Forensic leh puak thei thiamten an chhui mek.