Tunlai hian Mizoramah ruihhlo tawlh a hluar hle a, police leh excise force-in ruihhlo thahnem tham tak an man thawm hriat tur a awm reng a. Ruihhlo tawlhna kawngah hian kumtlinglo naupangte inhnamhnawihtir thin an ni a; Champhai district-a naupang kumtlinglo pawikhawih thubuai ziah luh zinga a tam ber pawh ruihhlo tawlha inhnamhnawihtir thubuai a ni.
Champhai District Child Protection Office chuan kumin chhungin Juvenile Justice Board leh Child Welfare Committee hnuaiah thubuai 30 an ziak lut tawh a, heng zinga tam ber chu naupang kumtlinglo ruihhlo tawlha inhnamhnawihtir thubuai a ni.
Champhai district bakah Mizoram hmun dangah pawh ruihhlo tawlhna kawnga naupang kum tlinglo inhnamhnawihtirna hi a hluar niin ruihhlo dona kawnga hma la thintuten The Zozam Times an hrilh.
Thudawn zel danin, naupang kumtlinglo vak rawllai thenkhat chu kum upa zawk, ruihhlo ti thinten tawktarh itawm tak hmanga thlemin ruihhlo an laktir thin a, a hnu lamah tihtir chhunzawm vein kum naupang tete ruihhlo bawiha tang an awm nual phah niin thudawn a ni.
Champhai District Child Protection Office hotute sawi danin kumin chhungin Child Welfare Committee hnuaiah thubuai 16 an ziak lut tawh a, heng zinga a tam ber chu nu leh pain ruihtheihthil an tih avanga naupang kumtlinglovin harsatna an tawh thubuai a ni a, thubuai panga ziah luh a ni.
Hursualna lam hawi zawnga naupang khawih thubuai pahnih leh naupang rilru lama buai thubuai pahnih ziah luh a ni bawk.