British boxer, world heavyweight champion hlui Anthony Joshua chuan Oleksandr Usyk laka a champion kawnghrente a hloh hnuah lak letleh tumin a bei a. Nimahsela hlawhtling zo lovin Ukrainian boxer nena an rematch-ah a tlawm.
Pathianni zing khan Saudi Arabia a Jeddah khawpuiah boxer pahnihte hi an inhmachhawn a. Joshua-a’n theihtawp chhuah mahse kawng engkimah Usyk-a thiam chu a chhanglet thei lova. Judge ten 115-113, 112-116 leh 115-113 in champion lai split decision in an chak tir.
A thiam zawk a chak
Nikum September khan London-ah Usyk hian chiang takin Joshua hi a hneh tawh a, tun tumah Joshua in WBA (Super), IBF, WBO, leh IBO heavyweight title te lakkir ngei a tum.
A che vel pawh an intum hmasak aiin hma a sawn tih a hmuh theih. Nimahsela Joshua-a’n hmachhawn harsa a tih thin veikhawr boxer Usyk a inveng thiam a, a che a ran zawk bakah a thiam zawk miau avangin a chan a tha tluan a. Intluk tawkna viau round tlem awm mahse a chak a chiang a, split decision a ni chu thenkhat mak tih a hlawh.
Ukrainian boxer chuan, “He hnehna hi ka chhungte, ka team leh ka ram tan ka hlan. Kan ram venghimtu sipaite zawng zawng tan a ni a, in chungah lawmthu ka sawi.” tiin a chak hnuah a sawi zui.
A hmabak sawi zui bawkin, “Tyson Fury hi a chawl tak tak lo tih ka chiang. Min hmachhawn hi a duh tih ka hria. Keipawhin ani hmachhawn hi ka duh a, ani hi a nih loh chuan midang bi tum tur ka nei lo.” a ti bawk.