United States-a Miami Beach-ah chawlh pakhat, spring break an tih hmanga intawllen an tam em vangin coronavirus hripui darh hlauhthawn a ni a, khawpui thuneitute chuan zan lamah curfew an puang.
Zan dar 8:00 atanga zing dar 6:00 inkar chu April 12 thleng curfew puan a ni.
Thliakar ni bawk, khawpui ni bawk, Miami Beach-a an Mayor Dan Gelber chuan tourist sang chuang pungkhawm chuan an khawpuiah harsatna leh buaina a thlen niin a sawi.
“Rock concert neihna hmun ang mai hi a ni a, hmun tinah mipui an zi nuaih nuaih a. He hmunah ni lo, hmun dangah sapatalna zawng rawh u,” a ti.
Tun tuma chawlh an hman mek, spring break an tih hi US-a sikul leh university-te chawlh hun a ni a, March leh April thla inkarah a ni deuh ber thin.
Florida-ah hian zirlai sang tam takte leh ram chhung hmun lum deuha awmte chu he hunah hian chawlh hmang turin an fuankhawm thin a ni.
Thuneitute chuan he hun hmang tura kalte chu thuawih taka chawlh hmang tur leh man ngaia awm lo turin a ngen.
Thuneituten ngen nasa hle mah se zirlai, thalai rualte hi tun kar tawpah pawh khan an intawllen nasa hle a, a tam zawk chuan hmai an tuam lo va, mi dang hlata awm chu an zawm lo hle tih thlalak thehdarhah pawh hmuh theih a ni.
Florida hi US-a coronavirus darh nasatna hmun zinga mi a ni a. Ram chhunga kai tawh zawng zawng maktaduai 29 zinga maktaduai hnih chu he hmun atang hian hripui len tirh atang khan kai an awm tawh a ni.
US Centers for Disease Control & Prevention (CDC) chuan Florida-ah hian tun hnai kar kalta chhovah khan ni tin kai thar mi 4,300 ang vel zel an awm niin a sawi bawk.