Pakistan-a police-te chuan an ram prime minister hlui, Imran Khan chu firfiakte dona dan hmangin thubuai an siamsak.
Khan-a hian an police leh court rorelna kalhmang nasa taka sawisela a lamhnai leh a thawhpuite man leh kutthlaka a puh hnua thuneituten amah an chhui ve a ni.
Amah thlawktute chu a in tualah pungkhawmin man a nih chuan na taka an chet tur thu an sawi a. Hetih lai hian man a nih hmain bail niin hei hian Ningani thleng a daih dawn.
April thlaa paih thlak a nih atang khan Khan-a hi sorkar leh an ram sipai nasa taka bei leh sawiseltu a ni.
Police chuan cricketer hlui, politics khel zui ta hian thuneitute chu a mite zinga mi pakhat, ram do zawnga chea puh a nih avanga an man sawisaah a puh tih an sawi.
Thuneitute chuan Khan-a hian an ram anti-terrorism act bawhchhiain sorkar hotute tana hlauhawm a siam niin an sawi a ni.
Prime minister hlui chenna, Islamabad-a a in tualah amah chhui a ni tih puan a nih hnu lawkah an pung khawm a, police-in an man a nih vaih chuan an khawpui chu ‘an la dawn’ tih an sawi.
Khan-a kaihhruai party flag nena inthuam eng emaw zat chu tlang chhipa a chenna, Bani Gala-ah awm khawmin an hruaitu an thlawpna thu aupuiin an zai rual bawk.
Inah hian amah a awm em tih hriat a ni lo va, an puhna hi engtin mah a la chhang lo bawk.
Khan-a’n politics-a a thawhpuite chuan an hruaitu paih thlak tak hi man a nih vaih chuan sorkarin ‘tiamchin’ (red line) a pel a nih tur thu leh thil tha lo zawk a inher chhuah tur thu Thawhtanni khan an sawi.
“Imran Khan hi man a nih vaih chuan Islamabad hi kan la ang,” tiin Khan-a sorkara cabinet minister thin, Ali Amin Gandapur chuan Twitter-ah a tar lang.
Islamabad-a High Court chuan ni thum chhung man theih loh tura bail a phalsak rih a; mahse, an puhna thubuai erawh chu anti-terrorism court-ah ngaihtuah chi a nih thu a sawi thung.