Russian security agency-in an man, ISIS firfiak pawla mi chuan a inpuannaah India ramah beihna thlen a tum a, ‘rorel laia tel’ zinga mi ngei beih a tum tih a inpuang tih Russian news agency chuan a tar lang.
Mi firfiak man hian tun hnaia sawi hlawh tak thil avangin chet a tum tih a sawi nia tar lan a ni bawk.
Russian sorkara venhim hna thawktu, FSB-in video a tihchhuahah chuan mi firfiak hian Prophet sawi bawrhbanna a nih avangin India lakah phuba lak a tum tih a sawi.
ISIS hruaitu zinga pakhatin Turkey-ah thihchilh bomb tipuaktu ni tura a zirtir chhuah niin a insawi a, India-a rorel lai party lakah thihchilha beihna thlen turin ruahmanna a nei niin a insawi.
“IS hmang hian Prophet Muhammad tihbawrhban a nih avangin firfiak taka cheta phuba la tura tirh niin ka inngai a ni,” tiin a sawi niin TASS chuan a tar lang.
Russian Federal Security Service (FSB) pawhin an officer-ten thihchilh bomb tipuaktu, ISIS firfiak pawla tel pakhat, India ram hruaitu lawkte laka tharum thawh tum an man thu an puang ve bawk.
“Russia-a FSB chuan Russia rama an awm khap, Islamic State pawla mi ngei a ni tih finfiah pakhat man a ni a, amah hi Asia khawmualpui lailia rama mi niin a bomb pai tipuaka thihchilhin India-a roreltua telte beih a tum a ni,” tiin thuneituten thu an chhuah chu Sputnik-in a chhuah chhawng a ni.
India ramah hian sorkar chuan ISIS leh an hnuaia awmte chu ‘firfiak pawl’ tia chhalin Unlawful Activities (Prevention) Act, 1967 hnuaia First Schedule-a a dah zinga mi an ni.
ISIS hian internet hmangin social media platform hrang hrangah an ngaihdan leh kalphung an vawrh darh nasa a. Cyberspace changtu agency-te pawhin hetiang lam hi ngaihvenin dan hmangin a theih ang anga hma lak a ni bawk.
Russian thuneituten mi firfiak an man tak hi tar lan a nih dan atanga thlirin Indian political party pakhat thupuangtuin television-a thil sawihona pakhat Islam sakhaw dintu, Prophet-a chungchang a sawi vang niin a lang a. He a thil sawi hi Asia khawmualpui khawthlang lama Islam ramte chuan an helh hle nghe nghe a ni.
India pawhin party thupuangtu thil sawi chu demin Middle East ram tam takten an demna pawh a hriat thiampui a, heng ramte nena an inkungkaihna derthawn phah thuak pawh a siam tha leh tawh a ni.
Tun thla tirah khan Minister of State (MoS) for External Affairs Affairs V Muraleedharan chuan India-a political party-ten Prophet chungchang an sawi ang chi hrim hrim chu sorkarin a duh loh a nih thu leh Arab ramte nena an inkungkaihna khawih thei a nih thu a sawi.
Muraleedharan-a hian ram rorelna in sang, Rajya Sabha-a ziaka chhan chi zawhna a chhannaah hei hi a tar lang a ni.
“India hian hman lai ata Arab ramte nen inkungkaihna tha tak a nei a, tun hnaiah kawng hrang hrang politics, sumdawnna leh investment, ram venhimna, venhimna thil, science & technology, culture leh ram mite inkara inpawhna thilah pawh inzawmna thuk zawk siam zel a ni,” a ti.
Minister hian sorkar pawhin Arab ramahte inkungkaihna tha zawk a awm zel theih nan palai pawh a dah reng tih a sawi bawk.