Chinese khawpui, Shanghai chei mawitu, in chhawng sanga thil kah ênte chu power renchem nan zan hnih chhung tihên a ni dawn lo.
The Bund tia an sawi mai hi khawpui bula tuipui hnaih in sang tak takte an kah ên thin a ni a, khualzinte pawhin an tlawh nasat tak hmun a ni.
China hmun dangte ang bawkin Sichuan province-a he êng tichhuaktute chuan power hman tam lutuk tihziaawm nan an tithum dawn tih an sawi a ni.
Khawvela economy ram liam ber pahnih hian khaw lum uchuak tak an tawrh mek karah khawkheng nasa tak an tawng mek.
Pathianni khan Shanghai Landscaping & City Appearance Administrative Bureau chuan khawpuia lui lian ber kianga awm, Bund-in a huam inte chu Thawhtanni leh Thawhlehnia tihên a ni dawn lo tih a puang a ni.
“He thilin buaina a siamsak zawng zawngte lakah ngaihdam kan dil a ni,” an ti nghal.
China hian kar hmasa khan a vawi khat nan khawkheng an tuar tih an puang a, a hma lawkin Yangtze Delta region-a Shanghai bakah chhimthlang lama Sichuan-ah te chuan chawlhkar eng emaw zat khaw lum uchuak tak an lo tuar tawh.
Sorkarin inralrinna a tihchhuahah ‘yellow alert’ pek niin hei hi a sang ber pathumna a ni.
Sichuan province thuneitute chuan khaw lum lam chu 40°C a kai hial thu an sawi a, ruah a sur tlem bawk si a, hei hian mipuite tan air condition mamawhna a tisang a, power khaihlak a awm phah thei niin an sawi.
Province chhungah power renchemna tura inkhuahkhirhna an hman chu ni nga dang pawt sei lehin Ningani thleng an kalpui dawn tih chanchinbute chuan an tar lang a. He inrenchemna hian industry thenkhata an pek thin ang zat pek loh pawh a tel a ni.
German car siamtu lian, Volkswagen pawhin Sichuan khawpui, Chengdu-a an hmun chu an khar rih tih an sawi.
Volkswagen thupuangtu chuan an tum anga an insiam zawh zung zung theih a beiseiawm loh thu leh a ziaawm leh thuai a rinawm thu a sawi.
“Thil thleng kan vil reng a, kan supplier-te nen pawh kan inbepawp reng a ni,” a ti.
Sichuan thova hmun nei, Apple supplier Foxconn pawhin an hmun an khar thu an sawi a, an siam chhuah a nghawng dan tur erawh an sawi lo.
Hetih lai hian Japanese auto giant Toyota chuan Sichuan-a an hmunpuiah in-house power generator bun a tahtawlin hna an thawk leh tan tih an sawi ve thung.
Thuneitute chuan China ram laili leh chhimthlang lamah khua a lum bakah ruah a sur tlem hle tih an sawi a, khaw lum pawh a rei ber tum a ni tih an sawi.
Asia khawmualpuia tuikawng thui ber, Yangtze River chhehvela province tam takah tui a kam a. Ruah a sur theih nana hma lak nan Hubei leh province eng emaw zatah chuan rocket-in vansangah chemical an kap chhuak tih tual chhung chanchinbute chuan an tar lang.