MZP buatsaih, ni hnih awh Thu leh Hla Kûtpui, Vanapa Hall, Aizawla neih chu nimin khan a tiak a. Kûtpui tiak niah hian MAL Book of the Year atana thlan tawh lehkhabu ziaktu leh buatsaihtu mi 27 leh pawl pakhat chawimawi an ni.
Thu leh Hla Kûtpui tiak niah hian chawhma lamah Zonuni Pachuau-in kûtpui chhimtute hmaah ziaktu lar – B. Vanlalzari, C. Lalnunchanga, Prof. RL. Thanmawia leh B. Lalthangliana te a kawm a, chawhma lam hun hi Minister of State Robert Romawia Royte-in a hmanpuiin, “Ram leh hnam venhimna leh vawnhimna atana hmanraw pawimawh em em chu thu leh hla a ni a, hnam chanchin vawnghimtu a ni,” a ti.
Chawhnu lama kûtpui kharna inkhawmah MAL Book of the Year (1989 atanga 2021 thleng) atana thlan tawh lehkhabu ziaktu leh buatsaihtu mi 27 leh pawl pakhat chawimawi an ni a. Kûtpui kharna inkhawm hi Chief Minister Zoramthanga’n hmanpuiin, “Thu leh hla hi hnam anga min dinchhuahtirtu a ni a, kan tihausain kan tihmasawn zel tur a ni,” a ti.
Chief minister chuan Mizo tawng chu tawng har tak nia sawiin, “Kan chhehvela kan unaute tawng hrang hrang luankhawmna leh inchhunkhawmna, Zofate min phuarkhawmtu a ni,” a ti a. “Mizo hnam hi a neitu bik kan awm lo va, chi peng hrang hrang inzawmkhawmin kan hnam hi a siam a, a intineitu apiang a neitu kan ni mai,” a ti bawk.