India-a Supreme Court-in January thlaa Prime Minister Narendra Modi-a zinkawng dan a nih chhui tura a tihte chuan Punjab-a police hotu ber chu a mawhphurtuah a puh.
Court hian Modi-a’n a zinkawng a thlak dawn a ni tih a hriat hnuah pawh police lal hian ‘a kawng zawh tura venhimna a tichak lo’ niin a sawi.
Modi-a hi lungawi lohna lantirtuten an lo dan avangin a thuihhruaite nen kawng chhawngah minute 20 zet an tang a ni.
He thil thlengah hian Punjab-a cabinet minister hial bân phutna a awm.
Union home ministry chuan he thil thleng hi ‘prime minister himna kawnga tihsual lian tak’ tiin a sawi a ni.
Supreme Court chuan thil thleng chhuitu tur committee a din a. Ningani khan Chief Justice NV Ramana-a kaihhruai bench chuan chhuitute report hi puangin sorkar laipui leh state sorkarte hnenah ‘a tul anga hma an lo lak theih nan’ a pe.
Report-ah hian he thil thlen laia Ferozepur district senior superintendent of police Harmandeep Singh Hans chu ‘a tih tur hlen lo’ tia tar lan a ni a. Thil thlen hnuah khan a awm hmun hi sawn nghal a lo ni tawh hrim hrim.
Modi-a leh a thuihhruaite dan hi Punjab assembly inthlan hma lawk a ni nghe nghe.
Modi-a hi Punjab-a Bhatinda tumhmunah tumin hmun hniha hun hmang tura tih a ni a, pakhat inthlan campaign-a vantlang inkhawma a telna tur niin helicopter-a kal tura ruahman a ni.
Khaw awm danin a zir loh tak em avangin a thuihhruaite nen kawngpuia kal tura tih an ni chawpchilh a. An kalnba tur thlen hma km 30 vel la awmah dan an ni ta a ni.
Lo dangtute hian Union Home Minister of State Ajay Mishra-a ban an lo phut a, ani hi a hma October thlaa lo neitu mi pariat thihnaah a fapa a inhnamhnawih nia puh a nih avanga bâng tura nawr a ni.
Lo neitute thihna hi Punjab bakah India ram hmun dang dangah pawh thawm nei lian tak a ni.
Modi-a kaihhruai BJP sorkar chuan prime minister zinkawng dan a nih chungchangah hian hetih laia Punjab-a sorkar, Congress party an puh a, anni erawh chuan an pha thung.
A hnu lawka inthlanah Congress hi tlain Aam Aadmi Party-in thuneihna an chang mek.