Bollywood film boycott thlipui tleh vut vut mek karah September 9, 2022 a tlangzarh tur ‘Brahmastra’ chu a langsar ber leh ta.
Amitabh Bachchan, Ranbir Kapoor leh Alia Bhatt te inlanna film hi en lo leh buaipui lo tura ngenna leh sawmna chu social media-ah trending a ni leh tawh a, filmstar te tan mangchhia a ni chhunzawm zel.
Tunhnai khan film beiseiawm leh hit ngei tura rin kai, ‘Laal Singh Chadda’, ‘Raksha Bandhan’, ‘Dobaaraa’ leh ‘Liger’ te chu Boycott runpuiin a tuam hlup hlup hnu-ah Box office-ah an chechhia.
Tunah hian #BoycottBramastra thawm a ring leh tawh a, he film-a inlan te’n tunhma lama sakhuana pawisawi zawng an tawngkam leh chet dan vel te phawrh chhuah leh niin, an thusawi leh khawsak dan te chuan a vawlet leh dawn ni maia ngaih a ni.
Hman deuh khan Alia Bhatt-i’n a film te chu a duh dan en theih, duh lo te tan en lo mai tur, tih lam hawiin a lo tawngchhuak tawh bawk a, tunah an haw thar nasa hle.