Aizawl : Mizoram Larsap Hari Babu Kambhampati chuan nimin khan Raj Bhavan-ah Mizoram State- National Health Mission (NHM) leh National TB Elimination Programme hotute a kawm a, Mizoram chhunga TB vei inenkawl mek zinga, mi 20 te chu thla tina chaw hrisel an leina tur sum a tumsak dawn tih a sawi.
Larsap Hari Babu Kambhampati chuan NHM hnuaia hmalakna programme zawng zawng te nung taka kalpui mek a ni chu lawmawm a tih thu a sawi a, he hmalakna huanga, mit leh beng enkawlna chungchangah naupang kum 5 hnuailam te uluk zawka enfiah theih dan awm se aduh thu a sawi.
TB umbo na tura hmalakna ah Khawpui pawn lam district hrang hranga Primary Health Centre (PHC) te thawm that leh damdawiin tenau zawka chil leh khak endikna siam belh a tul atih thu a sawi a, TB natna chu muangchanga enkawl ngai, damdawi te pawh a hun chat chata ei ngai anih avangin TB natna veitute inenkawlna uluk zawka vil turin State TB Cell a, hotute chu a chah a ni.
He hun ah hian National TB Elimination Programme hotute chuan TB vei inenkawl mek zinga khawsak harsa mi 13 te chu mi inphal te’n chaw tha an leina tur sum an tumsak thin tih Larsap chu hrilhin, TB damlo te tanpui hun chhung chu community support scheme ang chuan a reilo berah kum khat chhung zel tur a nih thu an sawi.
Larsap chuan, TB vei inenkawl mek zinga mi 20 tan thlatin a chaw hrisel leina tur – Nutritional Support a tum sak dawn tih sawiin, midang te pawh he rawngbawlna huangah hian tel turin a sawm nghal a ni.