Lirthei chesuala Indian billionaire Cyrus Mistry thihna chuan a tha zawngin nghawng a neih hmel a, kawngpuia himna dan zam leh khauh zawka kenkawh thlenga sawi rik a ni.
Thawhlehni khan Union Transport Minister Nitin Gadkari chuan car hnunga chuangte inhren behna (seat belt) hreng lote chu chawitir an ni thuai dawn tih a sawi a. Sorkar hian car siamtute pawh a hnunga thuten seat belt an hren loh chuan alarm ri thei tura ti turin thil a kalpui mek tih a sawi.
“Cyrus-a tawhsualna hian he thutlukna hi min siamtir a. Alarm chu a hnunga thuten seat belt a hren hma chu a ri char char dawn a ni,” tiin Gadkari chuan a sawi.
Tar lan tawh angin Thawhtanni khan kum 54 mi, Mistry hi Gujarat atanga Mumbai an pannaah kawngpui thenna sua chesualin a thi .
Tualchhung chanchinbute chuan a hnunga thu, Mistry leh a thutpui chu an thi a, seat belt an hreng lo ve ve niin police-in an sawi tih an tar lang.
India-ah hian car-a chuangte chuan seat belt an hreng vek tura tih a ni a; mahse, a hnunga thu bikte hi chuan an hreng mang lo thung.
Kum tin India-ah hian kawngpuia lirthei chesual avangin mi sang tel an thi a, kum 2021 phei kha chuan mi 1,50,000 chuang an ni a, darkar tin mi 18 thi ziah ang a ni.
Lirthei chesuala thi hi tam hle mah se ram pum huapa sawi leh a invenna lam sawi rik hi a tam lo hle a. Mistry-a’n tawhsual a tawh hnuah erawh mi tam takin social media-ah car thutna hnunga chuangte tana tawhsual tawha seat belh hren loh hlauhawm theihzia tihlanna second thum lek awh video chu an thehdarh nasa hle.
Indian sumdawng hausa, Anand Mahindra pawhin car hnunga thuten seat belt an hreng ngei tur a ni a tihna pawh Twitter-ah a tar lang a, road transport ministry pawhin hetianga a vei hi lawmawm an tih thu an chhanglet.
Hetih lai hian mi tam takin himna bul nia ngaihah ngaihdan dang an nei a. Lirthei khalhtu pawl chuan kawngpui siam dan a fuh loh chu chetsualna thlen chhan lian niin an ngai zawk a, ‘road engineering dik tawk lo’ chu a chhanah an puh.
Mi thiam dangte pawhin sorkarin kawngpui lianah design leh signboard chiang a tar a ngai niin an sawi ve bawk.
Tun hma deuh khan India-a car siamtu lian ber chuan sorkarin car zawng zawnga airbag paruk dah tura a tihna chu hnialin hnuhkir a lo ni tawh a. He kalphung hian car man a tihto dawn bakah car tê hralhna a nghawng dawn niin an sawi a; mahse, Mistry-a a thih hnuah hian Gadkari-a chuan he dan hi hman thuai tura tih thar a ni dawn tih a sawi.
He ruahmanna thar hnuaiah hian lirthei pakhata tawt taka inhnawh thin pawh a tihtawp theih beisei a ni.