Aizawl: Health Minister Dr R Lalthangliana chuan Zoram Medical College-a MBBS zir zote chu India ram ram hmun tinah an thawk thei tura ngaih a nih thu a sawi a, India ram pawnah an degree chu pawm a nih dawn leh dawn loh chungchang erawh en zau deuh a la ngaih tur thu house a hrilh.
Nimina Assembly Session-ah ZPM Legislature party Leader Lalduhoma zawhna leh member dang, Congress member Lalrindika leh MNF member Lawmawma Tochhawng zawh belhna a chhannaah health minister chuan, “An qualification chu medical college a nih angin India ramah chuan hman theih vek turah ka ngai,” a ti.
India ram pawnah an degree chu pawm a nih dawn leh dawn loh chungchang erawh a chhang fak thei lo thung a, en zau deuh a la ngaih tur thuin a chhang a ni.
ZMC-a MBBS 1st batch-te chuan nakum kum tawp lamah an zirlai an zo thei tawh dawn tih sawiin, chung hunah chuan NHM hnuaia thawk tur doctor an hmuh zawh loh harsatnate pawh an phuhruk thei an beisei tih a sawi.
Serchhip District Hospital thar sakna hmun tur chungchang zawhna chhang bawkin health minister chuan, “Serchhip District Hospital hmun tur chungchang hi a buaithlak khawp mai a, khilaia a chengten ngaihdan chi hnih an neih vang a ni mai,” a ti a, helai hmun hi tihchian ran a tul thu a sawi a ni.
Health minister chuan Mizoramah sub centre 375 awmah 313 chu health & welness centre-ah hlan kai a ni tawh a, a bak dangte pawh tun sorkar kum chhung ngeia upgrade an tum thu a sawi a, Primary Health Centre leh urban public health centre chu an upgarde zo thawkhat tawh tih a sawi bawk.