Thla liam ta, August thla khan Elisa khawl atanga dengue vei hmuh chhuah Mizoramah 84 an awm a, nikum kumtluana he natna vei hmuh chhuah aiin an tam zawk.
Health department hnuaia State Vector Borne Diseases Control Programme (SVBDCP) chhinchhiah danin 2021 chhung khan sample 420 endikah dengue vei finfiah 83 an awm.
August thla khan sample 507 enfiah a ni ve thung a, nikum kumtluana sample enfiah aiin 87-in a tam zawk a, dengue vei pawh 84 awmin, kum khat chhunga nat vei hmuh chhuah aiin pakhatin a tam.
Nikum endik zawng zawng atanga chhuta natna vei hmuh chhuah, positivity rate chu za zela 19.76 a ni a, August thla mal bika positivity rate chu za zela 16.56 niin, kum khat chhung leh thla khat mal inthlauhna hi a tlem hle.
Kumin January-August, thla riat chhung khan dengue vei nia rinhlelh sample 1,330 chu Elisa khawla endikin, heta tang hian dengue vei finfiah 135 an awm.
An zinga 106 lai chu Aizawl district chhunga cheng an ni a, Lunglei district chhungah 12, Kolasib district-ah pali, Mamit district-ah pakhat, Champhai district-ah pasarih, Lawngtlai district-ah pakhat, Serchhip district-ah pathum leh state pawn mi, Mizorama zin, dengue vei hmuh chhuah pakhat a awm bawk a, Siaha district-ah erawh thla riat chhungin dengue vei hmuh chhuah an awm lo.
SVBDCP hotute sawi danin sorkar laipuiin dengue veia a pawm theihte chu Elisa khawla finfiahte chauh an ni a, hetihlai hian tun hnaia dengue vei tam zawk erawh rapid test hmanga hmuh chhuah an ni a, hemi avang hian kuminah dengue hluarna veng leh khua awm mah se sorkar chhinchhiah chinah erawh dengue vei hi an tam thei lo nia thudawn a ni.