Boycott tura nawrna leh ngenna karah ‘Brahmastra’ film a dingchhuak dawn tho niin a lang a, ni hnihna ah khawvelpumah cheng vaibelchhe 85 chuang a lalut.
Hemi awmzia chu, he film hian ni hnih chhung lekin khawvelupmah cheng vaibelchhe 160 a lalut tihna a ni a, nimin lam nena chhut chuan kartawpah khan cheng vaibelchhe 250 a kai an ring.
Ranbir Kapoor leh a nupui Alia Bhatt te bakah Amitabh Bachchan channa ni bawk hi Hindi version bikah pawh a chetha hle a, dubbed version dang te pawh an pangnai. Tamil Nadu-ah phei chuan record thar a siam hial.
‘Bramashtra’ film hi Tamil, Telugu, Malayalam leh Kannada tawngte-a dub niin, a pali hian an chetha vek. Telugu version a chetha chho lehzual tura ngaih a ni a. Nagarjuna leh SS Rajamouli te an inlan avangin fan te a kokhawm hnem tura ngaih a ni bawk.
Report-a a lan danin, Tamil Nadu-ah hian inrinni khan cheng vaibelchhe 1.9 a lalut a, hei hi Bollywood film-in he state-a nikhat thil thu-a sum a lakluh hnem ber niin, ‘War’ leh ‘Thugs of Hindostan’ te record lo siam tawh a thaichhe hneh hle.
Pui miah miah
‘Bramashtra’ film hi Bollywood chanchina cinematic universe hmasa ber leh awmchhun ‘Astraverse’ bultanna hmanga siam hmasak ber niin, Karan Johar enkawl Dharma Production, Starlight Pictures leh midangte inrawlhna film-ah hian high-quality VFX changkang ber ber hman a ni a, Indian film siam tawha VFX hman tawhna dan nena khaikhin pawhin kawng engkimah a chungnung fal tura ngaih a ni a, cinematic work ah ngat phei chuan bung thar a keu dawn niin, an sawi.
‘Brahmastra – Part One: Shiva’ hi Bollywood-in ama puala cinematic universe a neih, ‘Astraverse’ bultanna hmasa ber a ni dawn bawk a, 2016 atang tawha buaipui he film hi a hmawrbawk turin kum 5 lawih nghah a ngai a, an zo thuak hnu ah Covid-19 hripuiiin a nuai chawpchilh zui bawk nen, hun a duh rei ta hle.
Bollywood star Ranbir Kapoor inlanna film hi Indian mythology-a innghat niin, ani hian Hindu pathian Shiva lemah a chang.