Mizoram Pradesh Congress Committee (MPCC) chuan MNF sorkarin sorkar hnathawkte hlawh pek a harsat lai leh damlo bill cheng vaibelchhe tam tak mipui an bat laiin an duhsak zawng contractor-te tan bill lakah sum harsatna a awm ngai lo tih sawiin, “An duhsak zawng contractor-te tan chuan a vur kum a ni reng mai,” an ti.
Inrinni khan MPCC-in Aizawl Press Club-ah thu thar thehdarhtute an kawm a. Congress thupuangtu, Dr Lallianchhunga chuan MNF sorkar hnuaiah sum leh pai harsatna chuan a vawrtawp a thleng chho mek a, Mizoram leiba nasa takin a pung a, sorkar hnathawkten thla tirah hlawh an la thei tawh lo a; health care bill ba ringawt pawh Rs. vbc 77 zet a tling tawh a, contractor tam berten hun rei tak an hnathawhna bill an la thei tawh lo niin a sawi.
Dr Lallianchhunga chuan Mizoram sorkarin sum leh pai lama harsatna a tawh mek lai leh contractor tam zawkin bill an lak theih loh laiin chief minister duhsak zawng contractor-te chuan bill lak kawngah harsatna an tawk ve ngai lo tih chu RTI kaltlanga chhanna an dawn atangin a lang chiang hle tih a sawi.
MPCC thupuangtu hian April 1, 2019 atanga July 14, 2022 chhunga Mizoram hmun hrang hranga treasury office pakua atanga contractor-te bill, Rs. nuai 100 chung lam chin RTI kaltlanga chhanna an dawn danin Kamlova Chhangte bill pathum, a vaiin, Rs. vaibelchhe kua chu an thehluh ni la lain Siaha Treasury atangin pek chhuah nghal a ni a; Kamlova Chhangte bill hrang hrang, Rs. vaibelchhe 9.92 chu chawlhkar khat chhung lekin Siaha Treasury atangin pek chhuah vek a ni bawk a. Chief minister laichin, Zoramchhana bill pahnih, Rs. vaibelchhe 8.84 chu bill a thehluh ni la lain Aizawl South Treasury atanga pek chhuah a ni a, a bill dang pahnih, Rs. vaibelchhe 3.65 pawh ni thum chhunga pek chhuak vek a ni bawk a; Robert Romawia Royte Company, NECS bill te, MLN Projects bill te, F. Lalliansanga bill te, Tantia Construction Ltd bill te, a vaiin Rs. vaibelchhe 8 chuang pawh bill theh luh ni la lain pek chhuak vek an nih thu a sawi bawk.
MPCC Media Dept Chairman Dr Lallianchhunga hian contractor tam zawkten thla tam tak bill an lak theih loh lai leh, Mizoram mipui tam zawk leh sorkar hnathawkte hnena pawisa pek tur MNF sorkarin a neih miah loh laia an duhsak zawng contractor-te bill pek kawnga harsatna a tawk miah lo hi hriatthiam theihah an ngai lo tih sawiin, “Mipui hmuhsitna dik takah kan ngai a ni,” a ti.
Mizoram sorkarin sum leh pai harsatna a tawh chhan hi MNF hruaitute chuan Covid-19 vanga an puh zel a; mahse, hei hi mipui bum tumna dik tak a ni tih sawiin, “Leiba Thang hlauhawm taka Mizoram a tanna chhan dik tak chu sum leh pai enkawlna kawnga MNF sorkarin kalphung mumal an neih loh vang leh an duhsak zawngte vurna kawnga tiamchin nei lo a an chet bawrh bawrh vang a ni,” tiin Dr Lallianchhunga hian a sawi.
MPCC thu leh hla
1) Kamlova Chhangte bill pathum – Rs. 1,54,15,277 te, Rs. 3,47,24,723 te, Rs. 4,00,00,000 te, a vaiin, Rs. vaibelchhe 9 chu an thehluh ni la lain Siaha Treasury atangin release nghal a ni.
2) Kamlova Chhangte bill hrang hrang cheng Rs. 9.92 chu chawlhkar khat chhung lekin Siaha Treasury atanga release vek a ni bawk.
3) Chief minister laichin (a tupa?), Zoramchhana bill pahnih, Rs. vaibelchhe 8.84 chu bill a thehluh ni la lain Aizawl South Treasury atanga release a ni a, a bill dang pahnih, Rs. vaibelchhe 3.65 pawh ni thum chhunga release vek a ni bawk.
4) Robert Romawia Royte Company NECS bill te, MLN Projects bill te, F. Lalliansanga bill te, Tantia Construction Ltd bill te, a vaiin Rs. vaibelchhe 8 chuang pawh bill thehluh ni la lain release vek an ni bawk.