State Crime Record Bureau-in an chhinchhiah danin kum 2017 atanga 2021 chhungin Mizoramah mahni intihlum mi 447 an awm a, kum nga chhunga mahni nunna la an tam ber kum chu 2020 a ni.
Mahni intihhlum do-na ni, World Suicide Prevention Day pualin Zirtawpni leh Inrinni khan hun hman a ni a, National Mental Health Programme (NMHP) buatsaiha hun hmannaah police hotuten kum nga chhunga mahni intihlum zat hi an tar lang.
Police hotute tar lan danin kum 2017 khan mahni nunna la 91 an awm a, a kum leh, 2018-ah tlem hretin 79 an awm. Kum 2019-ah tlem leh zualin 70 awmin kum 2020-ah erawh a pung ta hluai a, kum nga chhunga a ber ni turin mi 108-in an nunna an la a; nikum khan tlahniam lehin 99 an ni.
Kum nga chhunga mahni intihlum zinga zaa 83.22 chu mipa an ni a, hmeichhe erawh an tam lo hle a; za zela 15.88 chauh an ni thung.
He kum nga chhunga intihlum zinga zaa 37.36 chu zu leh ruihhlo ngawlvei, chumi avanga mahni nunna la nia ngaihte an ni a. Zaa 17.22 chu rilru lam damlohna neite an ni a, a bak chu nupa kar boruak chhe vang te, chhungkaw harsatna, inngaihzawnna chungchang, eizawnna chungchang vanga intihluma ngaihte an ni a; an kawppuiten an thihsan avanga intihlum ve tate pawh an awm niin chhinchhiah a ni.
NMHP buatsaiha World Suicide Prevention Day hmannaa khuallian, Health department-a Principal Director Dr T Lalhmangaihi chuan thalai zingah mahni intihlum an tam thu leh Mizoram bikah chuan hetiang thil a thlen chhan tam ber chu ruihtheihthil leh hmeichhiat mipatna lam hawi vang a nih thu a sawi a, hetiang thil duhawm lo laka invenna atan chuan rilru lam hriselna ngaih pawimawh a tul nia an hriat thu leh mahni intihhlum laka invenna chungchang chu kohhran huang chhungahte sawi tam a tul hle nia an ngaih thu a sawi.
Dr. Ruth Lalmuanpuii, Psychiatrist, Kulikawn Hospital chuan Mizorama Psychiatric Hospital-a mahni intihlum tumte zirchianna an neih report pein, zirchiannaa a lan danin intihlum tum hlawhchham an enkawl zinga zaa 50 chuan a hmain intihlum an lo tum tawh thin a, a tam zawk chu ruihtheihthil avanga rilru lama harsatna neite an ni.
World Suicide Prevention Day 2022 pual hian Department of Clinical Psychology, MZU leh Centre for Disability Studies, MZU leh Department of Psychology, Govt. Hrangbana College tangkawpte bultumin Inrinni khan Govt. Hrangbana College kawtzawlah hun hman a ni bawk.
He hunah hian mipui vantlang hnenah mahni nunna lak duhna rilru pu te, mahni intihlum leh rilru damloin a nghawng chhungkuate hnenah zirtirna an nei a, heng natnain a tihbuai mekten beiseina leh damna an chan theih nan zai leh lâmin zirlaiten zirtir tha nei leh awmze nei an entir a ni.