Aizawl: Social Welfare Minister Dr. K. Beichhua’n North East Khawdungseia ruihhlo do nana khawtlang hruaituten ralven buk hmun hniha an siam, ‘No. 4 Check Gate’ tia an vuah chu Pathianni khan a tlawh.
NE Khawdungsei YMA leh VDP ralven buk a tlawhnaah hian khawtlang chhanchhuahna atana YMA leh VDP ten ni 90 zet ruihhlo lut chhuak tur venga an duty chu ropui a tih thu sawiin, “Khawtlang tan mai ni loin, Mizoram chhanchhuahna a ni,” a ti.
Mizoram sorkarin ruihhlo beihpui thlak tumin hma a la tan mek tih sawiin Dr K Beichhua hian state level-ah Ruihhlo Do Core Committee leh Ruihhlo Do Working Committee din fel a nih tawh thu te, CYMA-in Central Anti-drugs Squad (CADS) first batch a lak luh tawh thu leh Khawdungsei khawtlang hruaituten sorkar phut ni loa ruihhlo do kawngah a sulsutu an ni thei chu lawmawm a tih thu a sawi.
Excise minister ni bawk, Dr K Beichhua hian mi thenkhatin zu do rem theih loh anga an sawi thin thu sawiin, “Kan khawtlang leh kan ram min ei chhe mektu hi zalen loa kan do hian mi tam tak kan chhanchhuak tih kan chian avangin sawiselna nasa tak karah hmingchhiat pawisa loin kan do tlat a ni,” a ti.
Minister hi bialtu MLA L Thangmawia, Vice Chairman, Human Resources Development Board leh Vice Chairman, Social Rehabilitation Board K Liantlinga, MADC Planning Vice Chairman N. Lalrosanga, Social Welfare & Tribal Affairs Department Director Zodingpuii, IAS bakah district official pawimawhten an tawiawm a ni.