Kar kalta Zirtawpni leh Inrinnia Hyderabad-a Union Minister of Parliamentary Affairs, Coal & Mines Pralhah Joshi hova neih – National Mines Ministers’ Conference-ah Commerce & Industries Minister Dr R. Lalthangliana’n Mizoramah Regional Coal exploration nei tura hmalak mek a nih thu a sawi.
Dr. R. Lalthangliana chuan Coal India ltd., Ministry of Coal hnuaia Central mine planning & design institute ltd (CMPDIL) leh Mizoram sorkara Directorate of Geology & Mining ten kum 2018-ah thawkho tura thu thlungin hemi kum atang vek hian an thawk ho tan tih a sawi a. Hmun/block hnihah lungalhthei zawng tura ruahman a nih thu sawiin, block khatna chu Thinghlun/Lushaicherra, Mamit district-ah sq. km 33 a zauva zawn tur a nih thu leh a pahnihna chu West Rotlang, Lunglei district-ah sq.km 48 a zauva zawn tur a nih thu a sawi.
Directorate of Geology & Mining-in draft tender document an siam tawh tawh thu leh CMPDIL-ah kumin May khan thelhluh a nih tuh Dr. R. Lalthangliana chuan a sawi a. CMPDIL pawhin an lo endik tawh thu leh siamrem ngaite siamrem a nih hnuah notice inviting tender tihchhuah a nih tur thu a sawi.
Lungalhthei zawn chu company te tih tur a nih thu leh sum sen ngai tur zawng zawng Central sorkar tum tur a nih thu Dr R Lalthangliana chuan a sawi a. Mizorama lungalhthei zawnna turah hian Directorate of Geology & Mining, Commerce & Industries Deptt. chu Nodal Deptt. niin, logistic support ngai zawng zawng an buaipui dawn niin a sawi bawk.
Sorkar thuchhuahin a tarlan danin, Dr R Lal thangliana chuan Mizorama Oil & Gas zawn hna pawh ONGC, Oil India (OIL) leh Vedanta Ltd. ten an thawh mek thu a sawi a. Chak zawka hna thawh theih dan tur pawh kumin June ni 22 khan Commerce & Industries deptt leh Directorate General of Hydrocarbons under Ministry of Petroleum & Natural Gas, ONGC leh Oil India Ltd (OIL) bakah Directorate of Geology & Mining official ten an sawiho thu a sawi.
Oil & Gas zawn kawnga chak zawka hmalak a nih theihna tur bakah oil & gas la zawn loh te block hran siama Global tender chhuah a nih theihna turin kumin March ni 25 khan Geology & Mining Director Lalțhazuala leh Dy Controller of Mines te chu Directorate General of Hydrocarbons office, Noida (UP)-a an kal thu pawh Dr R Lalthangliana chuan a sawi.
Sorkar thuchhuahin a tarlan danin Dr R Lalthangliana’n North-East states mines & coal ministers’ conference neih a rawt pawh Union Minister of Parliamentary Affairs, Coal & Mines Pralhad Joshi chuan remtihsakin, kumin October ni 28-ah Dimapur, Nagaland-a neih tura ruahman fel nghal a ni bawk.