Aizawl: Inrinni khan Bawngkawn leh Durtlang kham pangpera thing hmun leh ngaw la awmte dinhmun zirchiangin Principal Chief Conservator of Forests (PCCF) R. K. Singh, IFS hoin Save Chite Lui Committee nen an en fiah.
Aizawl khawpui tana lui hlu leh hmingthang, Chite Lui hnar awmna a nih avang leh Chite Lui chawmtu a nih avangin, tun hnai chhoa a chereu ta zel chu nasa zawka ngaihvena humhalh a tul nia hriain Bawngkawn leh Durtlang kham pangpera thing hmun hi an en fiah a ni.
Save Chite Lui Coordination Committee hruaituten he lai hmun hi nasa zawka humhalh a tul nia hriain Revenue Minister Lalruatkima leh AMC hotute an sawipui tawh a, hei bakah Larsap Hari Babu Kambhampati leh Chief Minister Zoramthang te hnenah thil awm dan thlenin an sawipui tawh.
Governor leh chief minister thurawn leh thupek angin heng lai hmun hi ngun zawka enfiah leh zirchianga a tul anga lo bawhzui turin Save Chite Lui Executive Committee thukhawm chuan PCCF a ruat a ni.
Bawngkawn leh Durtlang kham pangpera thing hmun zirchiannaah hian RK Singh, IFS, PCCF hi R.S. Sinha, IFS, Additional PCCF leh Aizawl DC aiawh, Land Revenue & Resettlement department aiawh, AMC aiawh leh Save Chite Lui Coordination Committee hruaitute bakah forest department hotu dangten an tawiawm a ni.