Bengaluru khawpui hi lirthei tawtna leh jam nasatna khawpui a ni a, tawi tê kal tur pawhin hun rei tak tak hman a ngai fo thin a. Hetiang karah hian tun hnaia doctor pakhat thiltih dan chuan mite rilru a khawih hle a, a damlo zai ngai a zai hman loh hlauvin a car atanga chhukin thui tak a tlan hmiah mai.
Dr Govind Nandakumar-a hi Manipal Hospitals gastroenterology surgeon a ni a, August 30 khan hmanhmawh taka phing zai ngai a awm thut a, damdawi in a pannaah Sarjapur-Marathalli kawngpuiah a tang ta si a ni.
A huna a thlen hman loh chuan damlo chu a thi mai dawn tih a hria a, Dr Nandakumar-a chu inngaihtuah buai lovin km thum zeta thui chu a tlan ta ngat ngat a. Instagram-ah pawh a tlan lai tawi tê hi video a dah nghe nghe.
“Ni tin Bangalore laili atangin khawpui chhimchhak, Sarjapur-a Manipal Hospitals hi ka pan thin a, mi zai tur hian kalkawnga ka hun hman tur nena chhutin thleng hman turin ka chhuak a, ka team pawh inrintirin ka thlen veleha zai theih turin an lo inbuatsaih a; mahse, traffic a lo jam nasa zual hle a, ka driver kalsanin car atanga chhukin ka tlan ta a ni,” a ti.
Dr Nandakumar-a team hi damlo zai tur hi kahhitna pek inring rengin an lo awm tawh a. Damdawi in a thlen ruala inzaina thawmhnaw hain operation theatre-ah a lut nghal a, an inzai nghal a ni.
Damlo pawh hlawhtling takin a zai a, tha takin a hun takah a chhuak tawh nghe nghe.
Dr Nandkumar-a hi Manipal Hospitals-ah hian Consultant – Gastroenterology a ni a, a damlo hi rei tak phing fel lo a ni a, zai hmanhmawh ngai a ni.
IT khawpuiah hian tun hnaiah ruah a tamin khawlaiah tui a tling nasa a. Social media-a video thehdarhah pawh Bengaluru-Mysuru highway-a tui tling leh kea kalte tan pawha thil a buaithlakzia pho lan fo a ni.
Khawpui chhung hmun thenkhatah phei chuan mi chengte che sawn thei lovin lawnglenga phurh chhuah an ngai hial hlawm a ni.