Aizawl : BJP Mizoram President Vanlalhmuaka chuan, “MNF sorkar hi a hrana central-a zuk hek an ngai hran lo, anmahni thusawi leh an thiltih hmang hian an inhek mai zawk a ni,” a ti.
BJP Lai Autonomous District Hqrs: Lawngtlai in Inrinni khan Lawngtlai Bazar venga Areopagi-ah vantlang inkhawm an buatsaih a. He hun hmanpuitu Vanlalhmuaka thian thu sawiin, MNF chuan central sorkar an dawr dawnin NDA-ah BJP te nen thawk dun an nih thu hahipin an sawi a, Mizoramah erawh BJP chu thawhpui chi an nih loh thu an sawi leh mai thin a. An nihna dik tak chu ‘lehlama awr dum, lehlama awr sen’ niin a sawi.
Vanlalhmuaka hian MNF sorkar hian thuneihna a chan hnuah sum lamah harsatna nasa tak a tawk tih sawiin, hripui avangin central atangin sum tam tak an dawn phah hial niin a sawi a. Sum leh pai enkawl kawngah an hlawhchham chiang hle tih sawiin mipuite hnena cheng nuai thum an intiam kha singnga ah an tla thla a, tunah phei chuan Rs 25,000 ah an tla thla leh tawh a, hei vang hian MNF chu sorkar zui zel tlak an ni tawh lo tih a sawi.
Congress party chungchang sawiin Vanlalhmuaka hian, India rama Kristian tihduhdakna thleng thin hi ukuk zawka zirchian chuan Congress sorkar-na state a thil thleng thin zawk a nih thu a sawi a. “Thiam takin Congress party hian BJP thiltih angin lantir dan a zawng a; mahse, BJP thung chuan, chutiang harsatna thlentu chu manin, hremna a pe zawk thung a ni,” a ti.
BJP chu a thil tumah a chiang a, mipuite hnena an intiamna te an tihlawhtling mai thin tih sawiin, Autonomous district council te pawh thuneihna lian zawk an neih theihna tura hma la mektu leh pek tum tu che BJP chauh an ni tih a sawi a. Kum 2023-ah chuan Mizoramah BJP telna sorkar hi a ding ngei tawh dawn niin a sawi bawk.