Mizoram University Southern Campus, Lunglei din tura hmalakna chak zawka kalpui a nih theih nan nimin khan Higher & Technical Education Minister Dr R Lalthangliana’n Union Human Resources Development Minister of State Dr Rajkumar Ranjan Singh a kawm.
Sorkar laipui dawra New Delhi-a cham mek, Dr R Lalthangliana hian union minister hi a pisaah kawmin Mizoram University Southern Campus, Lungleia din tura sorkar laipuiin January, 2020-a notification a lo tihchhuah tawh chungchangah sorkar laipui hmalakna muang lutuk leh harsatna thar awm chungchangte thlenin, Mizoram sorkarin a dinna tur ram a tihfel tawh thu hrilh nawn lehin chak taka hmalakpui turin a ngen.
Dr. Singh chuan Mizoram University Vice-Chancellor Prof. KRS Sambasiva Rao chu be nghalin Mizoram University Act, 2000-ah Mizoram University campus/centre dang hawn phalna dan a awm tih a hriatin e-mail hmanga rang taka thawn nghal turin a hrilh a, hemi dan tlawhchhan hian theihtawp chhuaha hmalak a lo tiam a ni.
H&TE minister hian union minister hi RUSA chungchangah India ram puma harsatna lian tak an tawh dan leh a nghawng awm theite a sawipui bawk a, RUSA-3 chu kalpui leh ngei turin a ngenin harsatnate chin fel dan ngaihtuah rang tura ngenna chu a lo enzui tur thu Dr Singh hian a sawi.
Dr. Singh hnenah hian Dr R Lalthangliana hian Bangladesh minister-in kumin April thlaa Mizoram a tlawh tuma thuchhuah intawm an siam copy chu thehlutin, hma laksak turin leh Bangladesh pawh dawrsak turin a thlen bawk.
Minister hian MSME Secretary BB Swain pawh hmuin Mizorama industry tenaute tihchangtlunna tur DPR pali a thehlut a, DPR-te tihhlawhtlin dan tur leh Mizoram sorkar hmalakna tur thil chi hrang hrangte, Mizorama industry tenaute tihhmasawnna tur thil dang pawimawh chi hrang hrang an sawi dun a ni.
Union Commerce & Industry Minister Piyush Goyal hoa vawiina Board of Trade meeting neih turah Dr R. Lalthangliana hi a tel ang a, hemi zawh hian Bangladesh High commission tlawhin an hotu pawimawhte nen border trade chungchang an sawi ho dawn a ni.