- Johny Zosangliana
Revd. Chuauthuama’n ktp General Conference Kolasib-ah, “Pathian thu zir rau rauah KtP a inhmang te chu an danglam bik” tiin ATC a a thawhlaia an experience a sawi. A pawmawm hle. He tiang deuh hian mi tam tak pawhin, “Rawngbawltu ni tur chuan KtP chhum hmin nge nge hi duh thu sam a ni” tiin an lo sawi thin. Hei pawh hi a pawmawm hle bawk.
Chutiang chiah chuan Sunday school: Beginner – senior Dept tha taka kal chhuak te hi chu an danglam bik fo mai. Kohhran an belh zui chuan, Sunday school kal mumal loa piangthar te aiin Rawngbawltu nghet leh tha an ni nge nge fo.
Dinhmun sang/pawimawh an chelh pawhin Kohhran taka rorel leh thiltih an nunah a lang chhuak fo. Kohhran bel zui ta lo te pawhin Kohhran zah nachang an hre bik a, peng bo mahse an kirleh nge nge duh khawp mai. Ram leh pawl hruaina kawngah pawh a tha zawngin an danglam bik deuh chuan a hriat.
Nuna bet sa hi chu a nghet thin. Phur vanglai a nun dan leh duhzawng te, Fel chawp, fel der ang chi hi chu a tlo lo. Sunday school leh Kohhran thalai pawl hmanga nun tha naupang te nuna tuh ngheh hi a tul hle.
“Naupan laia thil thiam leh zir hi chu a nghet bik thin” an tih angin, NPSS inkhawmpui atana an thil zirte hi an nun kaihruaitu tha tak a ni thin. An puitlin hnu thlengin an hria a, sual laka vengtu, kawng dik zawh kawnga anmahni puitu a ni fo.
Zirna leh chhungte hnathawhna avanga Sunday school kal mumal thei lo te, Kohhran inkhawm leh ktp/Kohhran thalai pawl a tel mumal remchang lo a sei lian te zingah mi fel tak tak an awm. An zirlai an zir zawh emaw, Kohhrana regulara an tel theih hnua Kohhran leh KTP/Kohhran thalai pawl a active taka tel zui ta, hruaitu hial ni chho te an awm thin. Chung mite chu an tha lo vek chu a ni lo. Mi fel tak tak leh lehkhathiam thiam tak tak te an nih avangin, Kohhran/Kohhran thalai Pawl bel na na na chu, rawngbawlna leh hruaitu nihna kum 2/3 velah kan pe/thlang a. Mahse, Kohhran/Kohhran thalai Pawl zia an nunah a intuh nghet tawk hman lo a. Kohhran ze hriat tawk lohna leh duhthusam nih chiah lohna lai an nei deuh niin a lang thin. Chung mi te avang chu a ni mai thei tunlaia Kohhran/Ktp leh Commitee/Department peng dang dang kalphung leh rorel te hi a Kohhran raih ta lo deuh emt NGO tih awm a mawi tawk, Politician then khat tih atana tha ang chi vel hmuh leh hriat tur a awm ta zauh zauh.
NPSS Inkhawmpui te hi, tunlai khawvel zirna kawnga inelna nasa tak hnuaiah pawh kan ngaihhlut deuh deuh zel a tha hle. An nuna Pathian thu leh hla intuh nghehna a ni a. Thu Inchhang an zir hmang te pawhin bible leh kohhran zirtirnaa zawhna awm thei chhanna, an nunah an hriat phah a ni. Vana kan chhawm tel theih awmchhun chu Pathian thu hi a ni.
Mizoram Synod in ram pawn khawpuia Kohhran a din ta zel te hi a lo tha phian mai. thenkhatin Mizo then hrang tu ah te an puh deuh a. “Pathian kan biak chuan a tawk, a pawl/kohhran zawnga tihhran a tul lo” ti an awm bawk. Dik nachen awm mahse, Kohhran pawna inkhawmnaah chuan Ze nghet leh kalphung mumal hi a lo awm lo nge nge a. A tlo lo deuh thin a ni. Tin, Kohhran rorel te hi duhthusam vek ni chiah bik lo mahse, thil dang ai chuan a laiin, a puitling nge nge thin. Eng Kohhran mi pawh ni ila, mahni Kohhran inkaihhruaina leh rinna vawng nghet mi nih hi thil tul tak a ni.