Helna avanga ralthuam chelekna, sik leh sa inthlak nasa leh khawvel puma hripui leng avangin ‘modern slavery’ an tih chu tun hnai kum eng emaw zat chhungin a pung hle niin UN-in report a tihchhuah tharah tar lan a ni.
International Labour Organisation (ILO) chuan a lo berah mi maktaduai 50 vel, mi 150 zela pakhat chu tihluihnaa hna thawhtir emaw, tihluihna hmanga nupui/pasal neihtir an nih thu a sawi.
Kum nga lek chhungin hetianga tih hi mi maktaduai 10 dawnin an pung hman niin an sawi.
ILO hian a chhe zawnga thil a kal chak lutuk chuan ‘a barakhaih hle’ tih an report-ah an tar lang.
“Mihring dikna chanvo palzutna hi engti zawng maha hmaihthelh chi a ni tawh lo,” tiin an director general, Guy Ryder chuan a sawi.
“Eng nge kan tih tur chu kan hre theuh va, kan zavaia kutsuiha kan tanrual a ngai a ni. Sumdawng pawl, hnathawktu pawl, khawtlang huap pawl leh mi tin maiin heng thil titawp tur hian chanvo pawimawh tak kan nei theuh,” a ti.
UN hnuaia labour organisation hian sal neih hi ram rethei zawka a awm mang lo tih a sawi a. Khawthlang ram, ram hausa leh a laihawl, sum lak luh lama sangten zinga heng sal zinga a zahve hi an awm niin an sawi.
Hna inthawh luihtir leh kawppui neih luihtir hi tun laia sak neih dan (modern enslavement) anga chhiar ve ve a ni a, hetianga tangte hi ‘hlauhna, tharum thawhna, thuneihna hmansualna, bumna leh thil dang avangin’ an tanna atangin an chhuak thei lo niin an sawi.
“Hna inthawh luihtirna sala tan hi chu kum eng emaw zat hnua tal chhuah theih a ni chawk a, nupui pasal inneih luihtir erawh a tlangpuiin dam chhung daih a ni tawh thung,” tiin report-ah hian an tar lang.
Report-ah hian mi maktaduai 27.6 chuang hna thawh luihtir an ni a, an zinga maktaduai 3.3 phei chu naupang an ni a. Heng naupang zinga a zahve aia tam mah hi mipat hmeichhiatna lam kaihhnawiha hna thawhtir an ni bawk.
Mi maktaduai 22 zet nupui/pasal neih luihtir an ni bawk a, heng zinga hmun thuma thena hmun hnih hi hmeichhia niin a tam ber hi pasal neihtir an nih lai hian kum 15 hnuai lam an ni nghe nghe.
ILO-in report a siamah hian ram hrang hrangte chu an theihna theuh thawhkhawma tangrual tura sawm an ni a, sal neihna thlentu harsatna hrang hrangte titawp tura tan la tura ngen an ni.
“Intiamna leh thu tha sawi chhuah ringawt a tawk zo tawh lo,” an ti.