Leonardo Bonucci hmangin huntawp dawnah an si phurh an sut a, goal khat neih belh leh ngei nia an inngaih avangin inkhel tawp lamah buaina a chhuak zui. Mahse referee in a pawm loh avangin Juventus leh Salernitana te 2-2 in an inhnehtawk.
Pathianni zana Allianz Stadium a Serie A inkhelah Juventus in huntawp dawn tawhah substitute Arkadiusz Milik hmangin chakna goal an khung niin an ngai hman. Mahse VAR hmanga endik niin Bonucci avangin pawm a ni lo.
Bianconeri hian tun season Serie A inkhel vawi ruk atanga vawi li draw result an neihna a ni a. A tawp thil thleng avangin team pahnih player-te inkarah buaina a chhuak.
Juve player pahnih Milik leh Juan Cuadrado te red card pek an ni a. Salernitana lam atangin Federico Fazio hnawhchhuah a ni ve bawk.
Mikhual team hian first half-ah Antonio Candreva leh Krzysztof Piatek hmang ten goal an khung a. Second half-ah Bremer chuan Juve goal hmahruai a khung.
Juve coach Massimiliano Allegri chuan inkhel zawhah, “A tawp thil thleng kha sawi zui vak ka duh lo. Thutlukna dik a ni em ka hre lova, referee te han zawh fiah pawh hi ka ti duh ngai lo. Mahse corner flag bulah khan Candreva kha a awm a, ka la enchiang leh ang.”
“Referee te hi an hna tha taka an thawh theih nan tihbuai loh tur an ni a, zaninah pawh referee leh official te khan hna an thawk tha hle.” tiin a sawi.