- Ruata
Toyota chuan an midsize SUV hmasa ber tur Urban Cruiser Hyryder chu India ramah an tlangzarh fel ta a, Rs. Nuai 15.11-18.99 man inkarah a awm dawn a, tunah hian a variant sang 4 – strong hybrid leh mild hybrid V AT te an tlangzarh phawt a, reiloteah mild hybrid pangngai leh All Wheel Drive ho an tlangzarh veleh dawn a ni.
He SUV thar hi Rs. 25,000 pe lawkin a book theih a. Kan tarlan thin tawh angin Maruti Suzuki nena thawkduna he SUV hi duan a ni a, he SUV ang deuh chiah Maruti Suzuki hming pu tur Grand Vitara chu reiloteah an tlangzarh beisei a ni bawk a ni.
A pawn lam
A design lama langsar deuh chu double-layer Daytime Running Light a neih te, a ‘Crystal Acrylic’ grille te hi a ni a. SUV lian pangngai tak huanga mi a ni a, Hyundai Creta te nena inel tur a ni kan tih tawh kha. Hybrid khawl a neih avangin Hybrid badge a nei a, hei bakah hian C shaped tail light te a nei bawk a. A lirthei design hrim hrim hi a mawi hle a, a rawng lamah chuan rawng chi khat hlang chi 7 leh rawng chi hnih inpawlh chi 4 te duhthlan tur a awm dawn a ni.
A chhung lam
A dashboard bawr hi tunhnaia Maruti Suzuki leh Toyota lirthei model chhuak mek an rawn tuaithar hrang hrang Baleno, Glanza leh Brezza thar te design a rawn pawl a. A chhung rawng hi a dun leh a uk inpawlh a ni a, hei hi strong hybrid khawl hmang hoin an nei ang a, mild hybrid hoah chuan a chhung rawng hi a dum hlang a ni thung dawn a ni.
Mild leh strong hybrid power plant
Toyota Urban Cruiser Hyryder hit midsize SUV zinga strong hybrid technology nei hmasa ber a ni dawn a. Toyota 1.5-litre TNGA Atkinson Cycle khawl hmangin hei hian 92hp power leh 122Nm torque a pechhuak thei dawn a, eCVT gearbox a hmang bawk dawn a ni. He khawl hi electric motor 79hp power leh 141Nm torque pechhuak thei nena thlunzawm a ni bawk a, he khawl pahnih hi an tangrual ang a, tha hman tam vak ngai loah chuan EV mode an tih, a electric khawl zawk chauh te hian a tlan thin dawn a, hei hian petrol a ti hehlo dawn a ni.
Strong hybrid system hian 177.6V lithium-ion battery a nei a, Toyota chuan he strong hybrid power plant hmang SUV hian fuel efficiency 27.97kpl a nei tih an sawi a. Petrol chu a heh dawn lo viau mai a, lirthei te zawk tam tak aiin a heh dawn lo a, hei hi sawi tawh angin hybrid system tha leh changkang tak a neih vang hi a ni.
Hyryder hian mild-hybrid khawl Maruti Suzuki atanga lak a nei dawn bawk a. Hei hian 1.5-litre K15C khawl a hmang dawn a, hei hi Brezza, XL6 leh Ertiga tharah te pawh kan hmu tawh a ni. ‘Neo Drive’ tia sawi he khawl hian 103hp power leh 137Nm torque a pechhuak thei a, 5-speed manual emaw 6-speed torque converter automatic gearbox emaw duhthlan tur a awm dawn bawk a ni.
Mild-hybrid engine, 5-speed manual gearbox hmangah hian All Wheel Drive system duhthlan tur a awm dawn bawk a. Midsize SUV zingah chuan AWD system hi Renault Duster-ah kan lo hmu tawh thin a, Duster-ah hian tihtawp a ni rih ta a, tunah hian Hyryder hi midsize AWD system nei mek awmchhun a ni rih dawn a ni.
Thildang
Hyryder trim level 4 – E, S, G leh V te a awm dawn a. Mild-hybrid tech hmang hi heng hoah hian a awm vek ang a. Strong hybrid erawh chu S, G leh V trim-ah te a awm thung dawn a ni. AWD manual-transmission hmang V variant-ah chauh a awm dawn a ni. Hyryder in a kentel tur langsar zualte chu panoramic sunroof leh 360-degree camera te a ni dawn a. Hei bakah pawh hian kentel hrang hrang, tunlai lirthei changkangin an neih ang chu a nei ve deuh vek dawn bawk a, midsize SUV changkang tak a ni.
A elpui tur langsar zualte hi Hyundai Creta, Kia Seltos, Volkswagen Taigun leh Skoda Kushaq te a ni a, nakin lawka tlangzarh tura beisei Maruti Suzuki Grand Vitara nen pawh lirthei inanga sawi theih chu ni mahse market lamah chuan an inel tho dawn bawk a ni.