Spanish rawlthar Carlos Alcaraz chuan a laka beisei sang tak awm chu a tak ramah a chantir a. Grand Slam title a lak hmasak ber ni turin US Open-ah a champion.
Kum 19 mi Alcaraz hi a thiam avangin mi tam takin tennis player ropuite zinga la tel ngei turah an ngai a. Grand Slam title la thuai turin an beisei.
Pathianni zanah Flushing Meadows-ah a laka mite beiseina chu a ti hlawhtling a. World number one thar ni nghal bawk turin final-ah Casper Ruud awlsam takin 6-4 2-6 7-6 (7-1) 6-3 in a hneh. Grand Slam final a khelh hmasak berah a hlawhtling nghal.
Tennis star thar a piang
Kum 19 mi hi kum 2005 a a hnampui Rafael Nadal-a’n French Open a champion hnua Grand Slam a mipa singles inelna a champion thei naupang ber a ni a. Hei chauh hi ni lovin kum 49 chhung hman tawh ATP rankings chanchin a kum 20 la tling lo zinga number one ni thei hmasa ber a ni.
A khingpui kum 23 mi Ruud pawh hi player beiseiawm a ni a, hnehna chang se world number one ni thei dinhmunah a ding. Mahse a chak zawh loh avangin Grand Slam final vawi hnih a khelh tawhah a tlawm ve ve.
Alcaraz hian set thumnaah set point vawi hnih a hmachhawn hman a. mahse a khingpui in set a la tur chu dang tluan theiin tie-breaker-ah 7-1 in a chakin set a la a. Set li-naah a khingpui tan dan theih a ni lova, tihsual a nei mang lo. A championship point hmasa zawkah vaw ‘out’ mahse a vawi hnihnaah a tisual tawh lova, ace vua in hnehna a chang.
Hmabak a eng
A ball vuak nat leh thahrui a ngah te chu ball vuak dan a thiamna nen a kalkawp tir thiam em avangin Alcaraz hian fak a hlawh a. Hengte piah lamah a che rang a, court chhungah thahrui leh tha zat lamah tluktu an tam lo.
World number one hlui Juan Carlos Ferrero hnuaia inzir hi naupang a nihlai atanga beiseina sang tak nena thlir a ni a. Kum 16 a nihin ATP Tour-ah a inkhel tan.
Kuminah khawvel hriat hlawh a invawrh tanin mipa tennis inelna lianah a che tha thei viau a. French Open quarter-final a luh bakah Miami Open leh Madrid Open-ah te a champion.
“Naupang ka nihlai atang tawhin Grand Slam champion nih a, world number one nih hi ka suangtuah thin a ni. Rim taka ka thawh chhan hi a ni a, ka tan chuan tun hi hun ropui leh hlu bik a ni.” tiin a champion hnuah a sawi.
“Thil kal chhoh dan hi awih har ka ti zawk a, kum 19-ah hetiang a champion hi ka inbeisei ngai lo. Hlawhtlinna um a tamna lian tak nei mah ila ka beisei aia rangin a lo kal.” tiin a sawi bawk.