Armenia leh Azerbaijan ram inkahnaah sipai eng emaw zat an thi.
Armenian Prime Minister Nikol Pashinyan chuan Thawhtanni zan zankhuaa an inbeihnaah an sipai 49 an thi tih a sawi.
Inthenawm ram hnihte hi kum 30 chuang zet chhungin vawi hnih an lo indo tawh a, buaina tenau an nei deuh reng bawk.
Russia chuan an indo hnuhnung ber tum khan dawrin inkahhai tura inremna a siampui niin a insawi a; mahse, Armenia erawh chuan indona hi a chawl deuh rih a ni mai a, a la tawp tak tak lo tih a sawi thung.
Ram hnihte buaina ber hi Nagorno-Karabakh region a ni a. Helai ram hi an inrina, Azerbaijan ram chin niin an pawm a; mahse, a mi cheng tam zawk hi Armenian an ni ve thung.
Azerbaijan lailia chengte nen an khawsak phung inang lo tak avang hian politics leh sakhua thlengin an inrem loh phah a. Armenia hi Kristian tamna ram a nih laiin Azerbaijan hi a tam zawk Muslim an ni thung.
Kum 1980 leh 1990 chhovah an lo indo tawh a, kum 2020 khan chawlhkar ruk chhung an indo tawh bawk a, a hnu lam leh hma lamah pawh buaina an nei reng.
Ram pahnihte hian tun tuma an inbeihna hi a chawk chhuaktu-ah an inpuh ve ve.
Armenia chuan ramria awm khaw tam tak chu an thenawm hian laipuiin an kap niin an sawi a, chu chu an chhanglet ve mai niin an inawi a. Azerbaijan pawhin an sipai hmunte beih a ni hmasa zawk niin an sawi ve bawk.
Buaina hi Thawhtanni zan thleng khan la awmin Moscow chuan inkahhai puang turin a be nghal vat a, Thawhlehni tuk atang khan hei hi kalpui a ni.
Azerbaijan-ah pawh thi an awm nual nia sawi a ni a; mahse, sorkarin thi leh hliam zat erawh a puang rih lo.
Indona chhuak hi ram hrang hrangin demin US Secretary of State Antony Blinken chuan, “Sipai chakna hmang chin fel theih buaina a awm ngai lo,” a ti.