AS Roma in an tlarhma a rinrawl an neih pahnihte goal khung hmangin hnehna an chang a. Empoli lakah Serie A inkhelah 2-1 in an chak.
Thawhtanni zana Stadio Carlo Castellani a inkhelah Roma tan Dybala chuan minute 17-naah goal hmahruai a khung a. Empoli in an tlarhnung atanga ball an lakchhuah tha tawk lo chu remchangah la in tun season a a goal thumna a khung.
Mualneitu hian minute 43-naah midfielder Filippo Bandinelli tauh goal hmangin an chhanglet a. Mahse minute 71-naah English striker Tammy Abraham chuan Roma chakna goal a khung.
Chelsea striker hlui hian Dybala ball siamsak chu penalty area chhungah a la a, tun season a a league goal hnihna a khung ve bawk.
Chakna goal khungtu Abraham chuan, “Team tha tak an ni a, tun season-ah an thawhrim em avangin khelh an awlsam dawn lo tih kan hria. Keini lamin vawi hnih tlawm tawh a inkhel kan hmachhawn avangin chak kan mamawh bawk.”
“Zaninah mimal a kheltha tak tak kan awm a, Ibanez leh Matic te an pawimawh hle. He hnehna hian inrintawkna lian tak min siamsak ang.” a ti.