Sorkar laipui flagship programme kalpui mekah India ram puma electric êng chhit man chawi dan tur chu pre-paid system-a leh vek tura ruahman a ni a, Mizoram chhunga consumer meter zawng zawng pawh pre-paid, smart meter-a thlak vek tura hmalak mek a ni.
Nimin khan Mizoram sorkara Power & Electricity Department-a engineer te tan pre-paid system chungchang zirhona, National Power Training Institute buatsaih a ni a. Mizoram chuan he metering scheme kalpuina tur hian Ministry of Power atangin Rs vaibelchhe 173.63 sanction a hmu tawh a ni.
Training-a an tar lan danin pre-paid system kalpuina turah hian P&E Department chuan DBFOOT model hmangin Advance Metering Infrastructure Service Provider pakhat a ruai dawn a, anni hian pre-paid-a êng chhit man top-up mai theihna tur thil tul zawng zawng an ngaihtuah dawn a ni.
Smart meter hman tan a nih hunah control centre atangin meter disconnect leh re-connect a tih theih tawh dawn a, bill ba chu chawplehchilhin a hmuna kal kher ngai lovin tihthim nghal theih a ni dawn a ni.
Consumer-in a hman tawk tetein, a êng chhit man zat tur thla khatah vawi hnih emaw, vawi thum pawh a top up thei tawh dawn a, thla tawpah a hlawma pek theih a ni tawh lo ang.
Smart meter prepaid- mode kalpui a nih hunah meter reading lak atanga bill siam thlengin, mihring an inrawlh thei tawh dawn lo a, bill siam sual lakah thui tak a veng thei tura beisei a ni.