Aizawl: Minister of State K Lalrinliana chuan nimin khan Kolasib District Hospital-a bun thar, thisen thlitfimna, Hemodialysis Unit a hawng.
Hemi puala inkhawm buatsaih, Kolasib bawrhsap John LT Sanga kaihhruaiah hian K Lalrinliana chuan dam lo enkawlna khawl pawimawh tak, Haemodialysis Unit hlawhtling taka bun a nih theih nana hma latu zawng zawngte chungah lawmthu a sawi.
Minister chuan district hospital thar, changtlung zawk sak a nih theih nan a sakna tur lungphum pawh phum thuai tura ruahman a nih thu a sawi bawk.
Kolasib district mipui bakah district pawn lam atang pawha damna beiseia Kolasib District Hospital-in pantu a nei thin chu lawmawm a tih thu sawiin, thawktute chu damlote tan taksa leh rilru damna thlentu ni zel turin a chah bawk a ni.
He huna an tar lan danin, District Hospital, Kolasib-a Haemodialysis Unit hi sorkar facility hnuaia a pangana a ni a, building sak nan MLA fund Rs nuai 14 leh Mizoram Health System Strengthening Project hnuaiah Rs nuai 7 hman a ni.
Haemodialysis Unit-ah hian dialysis tihna khawl pathum a awm a; heng khawlte hi Fairfax Foundation India kaltlangin ICICI Bank-te pek a ni.
Hemodialysis Unit hawnna inkhawmah hian district hospital-a thawktute leh Kolasib khawpui chhunga NGO hruaitute an tel a ni.