Mahindra Pickup 4×4 LPS Pro Muaythai a tel turte entry form an la chhuak tan a, lawmman pawisa fai Rs 3,60,000 sem ral a ni dawn.
October 7-ah R Dengthuama Indoor Stadium, Mualpuiah khelh tan tur a ni a, kum 15 atanga 45 inkar a duh apiang tan September 12 atangin LPS Office, Zarkawtah entry form lak theih. October 1 thlengin theh luhna hun hawn a ni.
Muaythai Association of Mizoram hruaitute chuan Olympic Games-ah Muaythai lakluh a nih tawh avangin Mizote tan beiseina sang tak an nei a, Mahindra Pickup 4×4 LPS Pro Muaythai atangin hmasawnna a awm ngei dawn tih sawiin tel turin thalaite an sawm nghal bawk.
Muaythai khelhna pangngai ring-ah ni lovin mixed martial arts hmanga an inbeihna cage chhungah an innuai dawn a, Muaythai amateur dan hnuaia inelna sang ber hmangin an inkhel ang.
Mipui tana hmuhnawm tur ringawt ni lovin Muaythai hnuaia an kalpui mek amateur leh professional tih hmasawn kawp an duh a, chumi mil tur chuan dan an siam.
Weight hrang panga, kg 48 chin hnuai lam flyweight, kg 48 leh 54 inkar bantamweight, kg 54 atanga 63.5 inkar lightweight, kg 63.5 atanga kg 71 inkar welterweight leh kg 75 chin chung lam super middleweight huangah title an inchuh dawn.
Weight tina champion hnenah Rs 30,000 zel pek an ni ang a, pahnihna Rs 15,000, semifinal-a tlaten Rs 7,500, quarterfinal-a tlaten Rs 3,000 zel an dawng dawn. Mahse, weight khatah tel 16 aia an tlem a nih chuan semifinal lut chin chauhin lawmman pawisa fai an la thei ang.