Aizawl: Editorial Consultant, Press Trust of India (PTI) Henry L. Khojol chu smuggling leh counterfeit lamah media kaltlanga hna a thawh that avangin Federation of Indian Chambers of Commerce & Industries (FICCI)-in chawimawina, Awards for Excellence in Journalistic Reporting on Smuggling & Counterfeiting Issues a hlan dawn.
Henry L. Khojol hi Mizoram Journalists’ Association (MJA) member niin Accredited Journalist a ni a. India ram puma he chawimawina dawng tura thlan chanchinbumi paruk zingah pakhatna (first prize) dawng tura thlan a ni.
Kum 1927-a din, India rama business organisation zinga upa ber leh lian ber, FICCI hian smuggling leh counterfeit-in India economy a nghawng nasat avangin kum 2011 khan smuggling leh counterfeit dona peng pakhat atan Committee Against Smuggling & Counterfeiting Activities Destroying Economy (CASCADE) a din a. Kum 2013 atangin smuggling leh counterfeit do kawnga hnathawk tha zual enforcement officer, chanchinbumi leh sikul naupangte hnenah chawimnawina an hlan thin.
Tun tumah hian chawimawina hi tun thla ni 22-23 chhunga New Delhi-a FICCI CASCADE inkhawmpuiah an sem dawn a ni.