Aizawl : Minister of State, Tourism, Sports leh ICT changtu Robert Romawia Royte-in nimin khan Shillong Mizo Students’ Union-in NEHU Convocation hall, Shillong-a zirlai tharte puala -Freshers Social- an buatsaih a hmanpui a. Shillong-a Mizo zirlaite chu Mizo nationalism nunpuia thanlenpui turin a chah.
Robert Romawia chuan Shillong-a Mizo zirlai thar te chu kohhran, YMA leh MSU te bel tlat turin a chah a, nasa taka lehkha zira nu leh pate chunga lawm nachang hre turin a chah bawk.
Shillong khawpui chu India independent hma atang tawha Mizote lehkha zirna hmunpui a nih thu Robert Romawia chuan sawiin, tun thlengin Mizote tan thiam zirna hmun hlu leh pawimawh a nih thu a sawi a. Shillong chu hmanlai atangin Mizo nationalism awi nunna, Mizo tam takin hnam veina thinlung an neih phahna hmun, Mizote tana pawimawh zual zel a nih thu a sawi.
Robert Romawia chuan India hmarchhaka hnamdangte bakah hmun hrang hrang atanga Mizo fuankhawm na a nih avangin Shillong-a tawnhriat neih chu a hlu bik niin a sawi bawk.