Thailand-a activist pakhat chu an ram lalnu inchei dan anga a inchei avangin an lal chhungkua deu leh hmusita puhna thubuaiah thiam loh chantir a ni a, kum hnih tang tura tih a ni a. Court thuremna duh lohna hi a na zui hle.
Kum 25 mi, Jatuporn ‘New’ Saeoueng hi kum 2020 khan lal chhungkaw thuneihna sang duh lohna lantirnaah thawmhnaw senno hain a kal a ni.
A incheina hmang hian lal chhungkua tihel tumna a nei lo tih a insawi a, an hnam incheia inchei mai a nih thu a sawi.
Mahse, Thailand-ah hian an lal leh an lal chhungkaw zinga mi sawisel leh hetiang lam hawia tih khapna dan khauh tak an nei a ni.
Kum 2019-a King Maha Vajiralongkorn-a’n lalthutthleng a luah atang khan mihring dikna chanvo humhalhtute chuan lèse-majesté law an tih, lal leh roreltute tan chuan dik lo pawh tih ngaihna dan hman tam a ni tawlh tawlh niin an ngai a, an lalte thuneihna a sang lutuk chu tihnep deuh an phut.
November, 2020 atang khan lèse-majesté law bawhchhia mi 210 vel man an ni tawh niin an rama dan lam pawl chuan an sawi a. Hei hi dan khauh zawk an hman atanga kum thum pawh tling lo chhung a ni.
Mihring dikna chanvo humhalhtute chuan Thawhtannia Jaturpon-i hremna tur thu tihtluk pawh an duh lo hle a. Kum thum tang tura tih zet ni mah se kum hnihah an titawi zawk a ni.
Lalnu incheina anga incheia an puh tum hi thil duh lohna lantirna hmun niin silk sennova inthuuamin red carpet a zawh a, a bulah nihliap kengin miin an zui bawk.
Lal nupui, Queen Suthida-i hian vantlang zinga a inlan dawn chuan silk a ha thin a ni.
Court-in a chungthu remna an puan hma lawk hian Jatuporn-i chuan, “Tu rilru mah tihnat ka tum lo, keimah duh danin ka inthuam a, keimah duh angin Thai incheiin ka inchei a ni,” tiin an kawmnaah a sawi tih Associated Press chuan a tar lang.
Amnesty International thupuangtu chuan, “Muanawm taka pungkhawm zinga tel tumah hrem tur an ni lo,” a ti.
Nikum khan sorkar hnathawk thin pakhat chuan social media-ah lal chhungkua a sawisel avangin kum 43 zet tang tura hrem a ni.
Nikum leh tuna thil thlengah hian lal chhungkua chuan engmah sawi an la nei lo.