Ukrainian sipaite chuan Russia-in an thunun lai ram an chhuhsak belh zel niin an ram president chuan a sawi.
Volodymyr Zelensky chuan an ram khawchhak leh chhim lamah September thla chhungin Russia-in an thunun ram sq km 6,000 zet an chhuhsak tawh niin a sawi.
Russia hian hmarchhaka Kharkiv region-a khawpui pawimawhte an chân a, sipai lama mi thiamte chuan indona kal meka er letna lian a tlin thu a sawi.
Moscow pawhin tun hnaiah an sipaite chu khawchhak lam, Luhansk leh Donetsk region-a insawrbing turin an ram thunun lai atanga an inhnuhdawh thu a lo puang tawh.
An sipai an hnuk kir hi Russia rama social media hmangtu tam tak chuan demin ‘zahthlak’ an tih thu a sawi.
Thawhtanni zan khan US Secretary of State Antony Blinken chuan Ukrainian sipaite chuan beihpui an thlak letnaah chak takin hma an sawn niin a sawi a; mahse, an hlawhtlin dan tur sawi lawk a la har niin a sawi.
“Russian-te hian Ukraine aiin sipai leh rapthuam an nei tha daih zawk a. Sipaite chauh ni lovin Ukrainian civil mite leh an hmunhmate an la bei reng bawk tih kan hmu,” tiin Blinken chuan a sawi.
Russian President Vladimir Putin-a chuan February 24 khan Ukraine rûnna tur thupek a chhuah a. Ukraine ram hmun ngaa thena hmun khat zet an laksak hman.
Thawhtanni zana video kaltlanga thuchah a sawiah President Zelensky chuan, “September thla tir atanga vawiin thlengin kan pasalthaten khawchhak leh chhim lamah sq km 6,000 an la tawh,” a ti.
“Kan sipaite hian hma lam an la pan zel,” a ti bawk.
Ukrainian-ten anmahni rûntute an beih letnaah hian ram an la chak hle a. Ningani kal ta khan President Zelensky hian an sipaiten sq km 1,000 an lak thu sawiin Pathianni khan sq km 3,000-a zau an la leh tih a sawi.
Zelensky hian an beih letnaa tel Ukrainian sipaite chungah lawm thu sawiin, ‘pasaltha dik tak’ a ti.
Ukrainian khawpui leh khua eng eng nge an lak tih erawh a sawi lo.