Sorkar laipuia Rural Development leh Consumer Affairs, Food & Public Distribution changtu, Union Minister of State Sadhvi Niranjan Jyoti chuan ni thum cham turin nimin khan Mizoram a lo thleng a, Vaivakawn chawhmeh bazara thu chawhmeh zuarte nen an inkawm.
Sadhvi hian nimin chhun khan Lengpui Airport thlengin Rural Development Minister Lalruatkima’n a lo hmuak a, Chief Minister Zoramthanga Delhi zin tur nen Lengpuiah hian an inkawm nghal bawk.
Lengpui atangin Vaivakawn bazar panpui nghal niin thlai thar zuarte tlawhin a kawm a, Vaivakawn bazar chanchin a lo hriat tawh thu leh nuho hlirin dawr an nghak tih a hriatin a tlawh châk hle tih a sawi a, bazar nuho bulah chuan thingtlanga pianga sei lian, thingtlangnu ve mai a ni a, VIP angah pawh a inngai lo tih sawiin, “In zingah hian ka mikhual lo,” a ti.
Bazar enkawltuten harsatna an thlen pakhat, Vaivakawn bazar building sak thatsak tura an ngenna chu project proposal-te an siam a nih chuan theihtawp chhuaha a lo bawhzuisak tur thu a sawi.
Union minister chuan Prime Minister Narendra Modi-a’n India hmarchhak a ngaih pawimawh thu sawiin, a thuchhuak anga Mizoram tlawh a nih thu a sawi a ni.
Sadhvi hi Raj Bhavan-ah thlengin nizan khan Larsap Dr. Hari Babu Kambhampati an inkawm a, vawiinah Mizorama ‘Aspirational District’ awm chhun, Mamit District a tlawh ang.