Kum 2019 atanga tun thlengin Mizoram chhung veng 17-ah eirawngbawlna gas, a leitute ina dah (home delivery) kalpui a ni tawh a, supply department-in ruahmanna an siamna veng tam thenkhatah erawh local council-ten tul an tih loh avangin kalpui a ni lo thung.
The Zozam Times-in a kawm supply department hotute chuan mahni kawtkai ngeia gas bur inpek a nih theihna turin sorkarin hma a la mek a, kum 2019 khan pilot project hmangin veng paliah gas home delivery chu kalpui a nih thu an sawi.
An sawi zel danin Covid-19 leng avangin gas home delivery kalpui chu a khaihlak a, kuminah hma an la chhunzawm a; Aizawla LPG distributor 11-te chu an huam chhunga veng pathum theuhah home delivery hi kalpui turin ruahmanna an siam.
Supply department hotute chuan AMC huam chhuang veng 29-a gas home delivery kalpui tura ruahmanna an siamah veng 11-ah tha taka kalpui a ni tih an sawi a, local council thenkhatin an huam chhungah kalpui a remchan loh thu department an hriattir tih leh distributor thenkhat pawhin gas sem tham book an awm loh avangin an kalpui that theih loh thu an thlen tih an sawi.
Gas home delivery kalpuina tura an ruahman la tihlawhtling lo vengahte point delivery titawp turin distributor-te an ngen tih supply department hotute chuan sawiin, home delivery la kalpui lohte pawh a tahtawla kalpui a nih thuai nan hmalak chhunzawm zel an tum thu an sawi a ni.
Supply department hotuten an sawi danin gas home delivery kalpuinaah hian gas leituten gas bur khat man pangngai bakah delivery charge Rs 70 an chawi tel a ngai thin.
Aizawl khawpui chhunga veng 15-a home delivery kalpui a nih tawh bakah Serchhip P&E Veng leh Kolasib-a |umpui Vengah pawh kalpui a nih tawh thu an sawi a, tun dinhmunah home delivery kalpui tawhna veng atangin complaint an la dawng lo a, an hriat chinah chuan mipuiin an zangkhaipui hle tih an sawi.
Gas home delivery kalpui mekna veng thenkhata local council hruaitute chuan tuna an kalpui danah hian gas lei duhin distributor hnenah phone call leh application hmangin booking an ti thin tih The Zozam Times an hrilh.
Gas bur 100 la duh an awm hunah distributor-te hian gas chu an sem chhuak thin tih local council hruaitute chuan an sawi a, “Bur 100 chin nghah a ngai lai hi mi thenkhat tan chuan a buaithlak deuh,” an ti.
Hemi chungchanga zawhna chhangin supply department hotute chuan, consumer-in gas a book niah distributor-te hian an pe tur a ni tih sawiin, hetih lai hian gas bur tlem tê chauh sem turin buaithlakna chin a awm avangin inhriatthiamna nen distributor-te tan pawha hautak lo zawngin kalpui rih a nih thu an sawi bawk a ni.