Aizawl : Aizawl West III bialtu MLA VL Zaithanzama’n nimin khan a bial chhunga awm Govt. Johnson College a tlawh a. Thawktu ten National assessment and accreditation council (NAAC) endik hmabak an nih thu lo hrilhin, chumi atana an mam- awhte an lo thlen a, an mamawhte chu a theih anga tihhlawhtlinsak a tum thu MLA chuan a sawi.
VL Zaithanzama chuan a biala zirna in hrang hrangte a tlawh kual mek a, Anganwadi atanga bultanin a biala zirna in hrang hrang te a tlawhchhuak thawkhat tawh a. “College tha tak nei tur chuan a chawmtu school te tihchangtluna, zirna tha kan pek hmasak a ngai” a ti.
Govt. Johnson College-in kawng hrang hrangah ber nihna an nei nual tih sawiin, VL Zaithanzama chuan College tha tak nei thei tura zirtirtu rual inpekna, sum mamawh thlenga thawhkhawma, building tha tak an nei thei chu ropui a tih thu a sawi bawk.
Govt. Johnson College hi kum 1993-ah private college-a din niin, kum 2002-ah deficit ah hlankai a ni a, kum 2007-ah provincialised a ni. Zirlai mipa 503 leh hmeichhia 676, an vaiin 1181 an awm mek a, Department (Arts subject) paruk awmin zirtirtu 31 an awm mek bawk a ni.