- Rinfela Zadeng
A tak lo zâwk hi buaipui nuam, mihring thisenin a ngeih leh kan pianpui a nih miau avang hian, he khawvela kan awm chhung hi chuan thil tha leh tangkai buaipui loa a phawvuaka buai hi kan awm reng dawn a. Chutih rual erawh chuan ram leh hnam huapa thil tak tak ni loa kan buai reng erawh chuan kan hmalam hun hi a thim zel dawn a, kan boral phah hial thei tih kan hriat reng erawh hi chu a ngai takzet a ni.
Lal Isua leh thutak
Khawvela Lal Isua Krista a lo kal lai khan, a chipuite leh roreltu te khan Lal Isua thuchah thutak kha buaipui loin a chheh velah an buai a. Lal Isua kha thutak hriattir tura lo kal a nih thu Chanchin Tha Johana ziak 18:37 ah khan Pilata zawhna a chhan khan kan hmu a nih kha. Pilata khan Lal Isua zirtirna leh thusawi kha hrethiam ve vek lo mahse Rom Sorkar pawisawi zawnga Lal Isua zirtirna kha a hmu lo a. Lal Isua pawh khan Thuthlung Hluia Pathian thu chah, chhandamna puanchhuah kha a buaipui ber leh a lo kal chhan ber niin chu chu min hriattir a duh a. Chu chauh chu buaipuiin a thi tih kan hmu a; chumi rah chhuah chu nang leh keia tana chhandamna a ni tih ka hre bawk. Kan rin Lal Isua khan a chhevela hmingthanna leh chawimawina buaipui loin a tih tur dik tak tiin a buai a ni tih te hi Mizoram Kristiante hian i zir chhuak nawn ang u.
Ennawm khawvel leh keini
Ennawm/Entertainment khawvelah kan awm a, en sen loh ennawmin min hual bawk. Chutiang buaipuite chuan sum leh pai tam tak an la lut a, an talent te hmangin hlawhtlinna ropui tak an chang a ni tih kan hria. Hetiang hi lo en ve loh emaw lo dodal emaw turin kan infuih lo a, kan en ve tur a ni. Mahse chumi ringawt buaipuia kan hun leh sum kan khawhral a nih chuan mi hlawhchham leh tangkaina nei lo mihring kan ni tihna a ni a. Chhungkua, ram leh hnam tana phurrit kan lo ni reng tawh. Eng emaw kan tih ve a ngai a, tangkaina leh hmasawnna nei tura Pathianin a siam kan ni tih kan inhriatchiana kan nunpui hi a tul takzet tawh a ni.
Zirlaite leh thil tak tak ngaihven
Sikul naupangte hi khawvel innghahna, ram leh hnam lungphum te kan ni a; eng thil nge kan buaipui thin? Instagram leh You Tube khawvelah kan cheng a, eng thil nge kan ena kan ngaihven thin? Ram pum huapa mi lar leh langsar ni lem lo hmeichhe hmel tha leh sexy deuh chuan followers leh likers tam tak a neih laiin, zirna lama min tanpui tur, nakin thlenga kan tana tangkai tur ‘page’ tangkai leh hlu tak tak te hian followers/likers an nei tlem em em a. Youtube te hi kan hmalam hun atana tangkai tur video aiin ngaihnawm leh mak, nakin zela ram leh hnamin hma a sawn pui loh tur thil te hian en leh ngaihven an hlawh zawk fo te hi vei tham a ni. Heng hi kan sawi sel lo a, heng bakah hian a tak tak, kan mi mal leh ramin hma a sawnpui theih tur hi i buaipui tel ang u. Mizo sex video darh te, mi chetchhiatna leh chanchin mawi lo ringawt buaia hmanhlel loin; Central Service-ah emaw ram leh hnam tana hlawkpui tur hna tha thawk tei turin i buai zawk teh ang u. Tu te emaw sexy taka an ‘live’ enchaka mengrei loin lehkhabu tha chhiarin zan i mengrei zawk teh ang u.
Nu leh pa te pawh
Nu leh pate pawh hian kan fate chanchinthar enpui te, an tana tangkai thei tur ngaihvenpui te hi taima zual teh ang u. Kan fate tan hian kan taima tawk lo fo thin a; kan nuam tih zawng leh duh zawng buaipuiin hun kan hmang a. Khawvel in elna sâng tawh tak hnuaiah kan fate hna tha tak nei turin kan beisei ringawt a. Chumi tura an kalna kawngah hian kan theihtawp kan chhuah tawk lo a; hna hmu zo lo, games khelh thiam em em leh zing tho tlai em em fa kan kawl teuh chhan te hi nu leh pate inthlahdah hmasak vang te pawh a ni ve bawk. Mobile phone hmanga fate kan awm tlei ringawt te hi siam that dan awm thei se la aw! Chutih rualin nu leh pa fel tak tak, fate ngaihsak em em hi kan awm teuh bawk tih erawh hmuh hmaih rual a ni lo e.
Thil tak tak, ram leh hnamin hma a sawna kan lo changkan zel theihna tura buai hi tun Mizo thalai tam zawkte hian kan mamawh takzet a. Social Media vela tawngkam mawi lo leh mi chanchin chhe lai sawia kan buaipui luih luih chhante hi kan hman lutuk vang leh thil tak tak kan buapui loh vang a ni. Kan ram politics te, kan kohhran leh kan ram awm zel dan tur te hi buaipui ila; kan ram Sorkar kalphung fel lo lutuk te hi i veiin siam that dan i zawng teh ang u.
Kan instagram, Facebook leh WhatsApp te hi kan mi mal nun, ram leh hnam tana nakin thenga tangkai thei turin i hmang thiam mawlh teh ang u.