UEFA Champions League-ah Spanish club Barcelona in German champion Bayern Munich an ngam hleithei meuh thin lo chu a la kal tluang a. Thawhlehni zan group stage inkhelah 2-0 in Catalan club an tlawm.
Barcelona hi kum 2020 August thla khan Bayern Munich hian 8-2 in an sawp tawh a. Kum 2013 semi-final ah 7-0 aggregate in an hneh tawh. Kum 2015 hnuah vawi li inkhel tawhin vawi li Spanish club hi an tlawmna chiah a ni.
Allianz Arena a tun tum inkhel tingaihnawm turin Bayern striker hlui Robert Lewandowski chuan a team thar kawr ha in a hlawhtlinna hmun a pan a. Inkhelah erawh chance tha engemaw zat hlohin goal an khung thei lo.
First half-ah Barcelona in football hlauhawm zawk an khel a. Huntha an hman tangkai theih loh an tuar.
Second half-ah erawh goal khung thuaiin inkhel an dahtha a. Minute 50-na leh 54-naah Lucas Hernandez leh Leroy Sane ten goal an khung.
Bayern coach Julian Nagelsmann chuan, “First half-ah chance an nei tha zawk a, Manuel-a’n min chhanhim. Second half-ah erawh chak tum zawkah kan tang a, kan huaisenna avangin goal hnih rang takin kan khung. Tihsual kan neih tlem zawkna kan chakpui.” tiin a sawi.
Barca coach Xavi Hernandez chuan, “Chance tha vawi sarih vel kan nei a, kan khung lo vek. Bayern in an huntha neih an hmang tangkai ve thung. Kan kheltha viau a, goal khat khung thei ila engkim a danglam ang.” a ti ve bawk.
Liverpool an chak hram
Beisei anga season bul la tan chiah lo Liverpool in huntawp dawna chakna goal khung an mamawh leh a. Joel Matip tauh luh hmangin 2-1 in Ajax an hneh.
Reds hi tun season UEFA Champions League a hnehna an chan hmasak ber a ni a. Napoli laka 4-1 a an mualpho hnuah an tho leh thei.
First half-ah goal hlauhawm an siam hnem a, an phu ang ngeiin minute 17-naah Mohamed Salah chuan Diogo Jota pass atangin goal a khung.
Mahse hei hi Mohammed Kudus chuan minute 27-naah a sut a. Ajax in Daley Blind hmangin chakna goal khung teuh zawk mahse huntawp dawnah Matip hmangin Liverpool an lawm ta zawk.
Liverpool head coach Jurgen Klopp chuan, “Kan match hmasa leh zanin kha thlirkawp ila, infiamna pakhat a ni tih pawh hriat a har zawk ang.”
“Kan inkhelh dan engkim a inthlak thawk. Goal kan ven dan leh kan tlan tam dan te, kan rilru puthmangte zaninah a tha hle. Mahse hei hi bul kan tanna tur chauh a ni.” a ti.
Group B lamah Spanish club Atletico Madrid chu an tlawm a. BayArena-ah Bayer Leverkusen hmachhawnin Robert Andrich leh Moussa Diaby te goal hmangin German club hi 2-0 in an chak.