Nikum October atanga kumin July thleng khan Champhai district-a mi 3555 thi- sen endik zingah mi 125-in HIV hrik an pai tih hmuhchhuah a ni a, hemi hun chhung vek hian Champhai district-ah Malaria vei 17 (Pf 9 leh Pv 8) hmuh niin, Dengue vei hmuh a awm lo thung.
Champhai district development co-ordination & monitoring committee (DDCMC/ DISHA) thutkhawm, tunkar Thawhlehnia an Chairman, Lok Sabha MP C Lalrosanga hova thutkhawma tarlan a nih danin, nikum October atanga kumin July thlengin Champhai district-ah TB vei hmuhchhuah 114 awmin, an zinga 10-in nunna an chan bawk.
Champhai district-ah kumin April leh June thla inkarah nausen thi 8 awmin, infant mortality rate (IR) 21. 27 a ni a, nu, nau chunga thi 2 awm in, maternal mortality rate (MMR) 531.91 a ni.
He thutkhawma tarlan a nih danin, sokar kum liamta 2021-2022 chhung khan Champhai district-ah MGNREGA hnuaiah job card nei 17704 te hnenah ni 98 inhlawhna siam a ni a, kum kal mek (2022-2023)-ah kumin August thleng khan job card nei 17857 te tan ni 42 inhlawhna siam a ni tawh.
Champhai district-ah ration card leh aadhaar thlunzawm hna zaa 94.22 zawh tawh niin, beneficiary nena thlunzawm hna zaa 86.79 zawhfel a ni tawh a. National social assistance programme (NSAP) hnuaiah tar chawmna/tar pension mi 1337, hmeithai pension mi 153 leh rualbanlo pension mi 37 te pek mek an ni bawk.