Aizawl: Lalruatkimi, Thenzawl Field Veng chu Thawhlehni tlai khan a hnathawhna, Delhi-a a in luahah thia hmuh a ni a. He thil thlengah hian Delhi Police-in thu zawhfiah turin mi panga an la nia thudawn a ni.
Thudawn danin kum 26 mi, Lalruatkimi hi Delhi-ah call centre-a thawk niin Thawhlehni tlai dar 5 leh dar 6 inkar vel khan a in luahah thia hmuh a ni.
Lalruatkimi hian a thiante Mizo leh hmarchhak mite nen in an inluah tawm a, tun hnaia a in luahpuiten an insawnsan hnuah he vanduaina hi a thleng ta niin thudawnna chuan a sawi a. A in luahpuiten an chhuahsan dawnin pawisa an batsak aiah an bungrua an hnutchhiah a. Pathianni khan a inluahpui thinte chuan an bungrua lak an tum thu an hrilh a, ani chuan an pawisa ba an pek phawt loh chuan a remtih bik loh thu a lo hrilh ve thung a, a thiante chuan an vau zui a, hei hi Lalruatkimi hian a pa hnenah pawh a hrilh nia thudawn a ni.
Thawhlehni chawhnu dar 2:50 vel khan Lalruatkimi chuan whatsapp message leh phone call hmanga a pa biain, a in luahpui thinte an lo kal thu a hrilh a, phone signal a that loh vanga an inbiak that theih loh hnua a pain phone call hmanga biak a tum leh chuan a phone chu switch off a inti a, a hnu lawkah an fanu chu a inawkhlum nia hriattir an ni zui ta mai niin thu dawnna chuan a sawi.
Lalruatkimi chhung hnai takte hnen atanga The Zozam Times thu dawn danin, he thihna thleng chungchangah hian Lalruatkimi chhungte chuan postmortem result ngaihchana result azira hmalak zui dan tur pawh ngaihtuah an tum a ni.
Nimin lamah tihfel ngaite tihfel hman a nih chuan vawiinah a ruang hi Mizoram pana hawpui hman tum a nih thu thudawnna chuan a sawi bawk.