Aizawl: MPCC President Lalsawta’n, “Mizote hnam ropuia kan insiam theihna tura pawimawh hmasa chu moral reform a ni,” a ti.
Sakawrdai Community Hall-a vantlang inkhawmah he thu hi nimin khan MPCC President chuan a sawi a. “Kan chenna khawvel hi chenna tlaka chhuah turin environment tichhe lo turin theihtawpin hma kan la dawn,” tiin, Congress sorkar chuan moral reform leh environment chungchang chu a ngaih pawimawh tur thu a sawi.
MPCC president chuan mihringah lei theih pahnih an awm tih sawiin, “Pakhat chu sal an ni a. sal chuan anmahni leitu tur an thlang thiang lo, a hausa apiangin an duh duh an lei thei,” tiin, “Pakhat leh chu nawhchizuar an ni,” a ti a. “Nakumah tuten emaw lei an rawn tum che u a nih chuan, ‘Keini chu lei theih kan ni lo,’ tiin lo chhang rawh u, kan zahawmna ber kan hralh hian engmah sawi theih kan nei ve tawh lo,” a ti.
Lalsawta chuan, “Kan tu kan fate tan khawvel thar siam turin i inbuatsaih ang u,” tia kalkhawmte chu sawmin, thluaka sum lut chu natna hlauhawm, tihdam theih loh a nih thu a sawi a. “Kan tu leh faten min chhuahchhalh lohna turin tun atang hian ngaihtuahna thar i hmang ang u,” a ti bawk.
Mizoramah eng hmasawnna pawh thawh a nih dawnin thil pahnih ngaih pawimawh em em tur a awm tih sawiin Lalsawta chuan, “Environment humhalh chunga mihring nun leh rilru chhungril tichhe zawnga hmalak lohte a pawimawh,” a ti.
Lalsawta chuan tang puih a inthlahrunawm loh thu sawiin, “Khawvel mi hausate hi an tan em avanga hlawhtling an ni,” a ti a. “Congress kan nih avangin ‘tang lo mah ila min pe tho ang,’ tih rilru kha lo pu suh u, hun thara chuan chhuah kan duh,” tia sawiin, “Kan hnathawhah puih tlakin kan tang zawk tur a ni, tang lo hi tuman an pui rei peih ngai lo,” a ti bawk.