- Ruata
Khawvel huapa Suzuki Jimny tia lar, India ramin a nghahhlelh em em Suzuki SUV Jimny chu a kawngka 5 awm chi India ramah an enchhin lai hmuh tur a awm chho ta a, he lirthei hi India ramah Maruti Suzuki Jimny tiin a chhuak ve ngei dawn niin a lang ta a, he India tana duan Maruti Suzuki Jimny hi Auto Expo 2023 kumtir lama neih turah an phochhuak dawn tih a chiang tawh bawk a ni.
Jimny hi Maruti Suzuki Gypsy lirthei kal zel tih te pawhin a sawi theih a. India rama Gypsy lar em em hi khawvel hmundang leh a lo chhuahna Japan ah chuan Suzuki Katana, Suzuki Samurai, Suzuki Jimny tihtein a chhuak a. Tuna Jimny lo chhuak tur pawh tunhnaia sorkarin himna hmanraw hrang hrang a phut awm kimna tur Gypsy a ni dawn ber a, Jimny hi khawvel hmundangah chuan a chhuak reng tawh a. India ramah hian chhuak ve mai tura beseina a san viau laiin tun thlengin a la chhuak ta lo a, hmundanga thawnchhuah tur 3-door Jimny erawh chu India ramah hian siam thin tho a ni a, tunah chuan a nghakhleltute tan chanchinthar lawmawm a lo awm leh ta a ni.
Maruti Suzuki Jimny a beisei tur hrang hrangte
Tunhnaiah Maruti Suzuki Jimny 5-door hi India ram kawngpuiah an enchhin a, thlalak leh video pawh a darh chak leh viau tawh a. Tunah khawvel hmundanga chhuak a 3-door version ai hian 300mm in a sei zawk dawn a, a wheelbase pawh 300mm in a thui zawk dawn bawk a ni. A pumpuia a lirthei lenzawng hi a dung 3850mm, a vang 1645mm leh a san zawng 1730mm a ni a, a wheelbase hi 2550mm a ni dawn a ni.
A chhunglamah hian tuna hmundanga chhuak te nena khaikhinin thil danglam liantham a awm a rinawm loh a, a thutna tlar hnihnaah erawh a hma aia a sei dawn avangin hmun awl nuam zawk a awm beisei a ni a. A chhung rawng an hman leh a ziarang chu tlemin India rama chhuak turah hi chuan a danglam hret beisei a ni bawk a ni. Tunah Jimny chhuak mekin 7 inch touchscreen a neih mek aia lian hret, 9 inch touchscreen a awm beisei a ni bawk.
A khawl lamah chuan Maruti Suzuki Jimny lo chhuak tur hian tuna Maruti Suzuki lirthei lian lam hoa kan hmuh ang, Maruti K15C 1.5-litre DualJet khawl a hman ve beisei a ni a. Khawvel hmundanga three-door Jimny hralhchhuahah hi chuan K15B khawl hlui zawk kha hmantir a ni a, he khawl hi India rama Maruti Suzuki lirthei hoah chuan K15C khawlin thlak tawh a ni. Gearbox lamah chuan five-speed manual leh six-speed auto te duhthlan tur a awm hmel a. Mahindra Thar tea kan hmuh ang a four wheel drive system atan manually operated transfer case chu a transmission hian a keng tel dawn bawk a ni.
Jimny hi Maruti Suzuki Nexa outlet atanga hralhchhuah beisei a ni a, hei hian tuna huangkhata a telpuia sawi theih, Mahindra Thar leh Force Gurkha te a rawn el dawn a, Thar leh Gurkha pawh hi 5-door an tichhuak tep tawh ve ve a ni. Heng SUV pathumte hi nakumah chuan a chhuah hman ngei beisei a ni a. Lei tum tan chuan tlema dawhtheih deuh a la ngai hlek dawn a ni.
Maruti Suzuki Jimny hi India ramah Maruti Suzuki Gypsy mipui nawlpui lei theih tur an tihtawp tak avangin duhtu leh nghakhleltu an tam hle mai a. Offroad Adventure lama tui leh 4 wheel drive system nei lirthei man to uchuak si lo duh tan chuan tunah hian duhthlan tur a tam lo hle a.
Helam lawm tan leh SUV lian lutuk lo, kawngchhia leh nal ngam bawk si duh tan chuan thu lawmawm tak a ni a. Dik zawk leh chiang zawkin a lirthei chungchangah leh a chhuah dan tur chungchangah pawh company lam atangin chanchinthar a rawn awm zel turah beisei ila a tha awm e.