New Delhi-a nimina Outlook Tech Summit leh Swaraj Awards semna neihah India hmarchhak state zinga agriculture-a hma la tha ber award chu Mizoram hnenah hlan a ni.
Agriculture Minister C Lalrinsanga’n lawmman hi Union Agriculture Minister Narendra Singh Tomar hnen atangin a dawng.
Outlook Tech Summit & Swaraj Awards hi New Delhi-a A.P Shinde Symposium Hall, ICAR compound-a neih niin agriculture leh a kaihhhnawiha India ram hmun hrang hrang atanga mi thiamten subject hrang hrangah presentation an nei a. Swaraj Award sem niin category hrang hrang zingah Mizoram chu Best Performing State in Agriculture among the North East States lawmman pek a ni.
He hunaah hian Agriculture Minister C Lalrinsanga chuan thu sawiin Mizoramin agriculture, a bikin organic leh natural farming-ah theihna tam tak a neih chu India ram tana thil hlu tak a nih thu sawiin, hemi avang hian avangin agriculture leh a kaihhnawiha hmarchhak tan bika scheme siam belh turin sorkar laipuiin tan lak a ngaih thu a sawi.
Agriculture minister chuan India ramin be thar chhuah kawnga indaih lohna nasa tak a hmachhawn mekah Mizoram leh hmarchhak state-te chuan organic leh natural farming mode hmanga thar turin theihna bik a nei tih a sawi bawk.
Mizoramin lawmman a dawn chungchang sawi bawkin, Outlook Tech Summit & Swaraj Award-a Mizoramin Best performing North East State in the field of Agriculture lawmman a lak chu agriculture lama thawktute, a bikin lo neitute leh sorkar thawhhona tha tak rahchhuah a nih thu sawiin, “He lawmman hi Mizoram lo neitute tan ka hlan,” a ti.
Agriculture minister hian New Delhi a cham chhungin sorkar laipuia mi pawimawhte hmuin Mizoram mamawhte thlenin hun a hmang chhunzawm ang.